एक तोला सुनको मूल्य २ लाख ५ हजार ९००

काठमाडौँ– अन्तर्राष्ट्रिय बजारमा सुनको मूल्यमा वृद्धि भएसँगै स्थानीय बजारमा पनि त्यसको असर परेको छ।

नेपाल सुनचाँदी व्यवसायी महासंघका अनुसार मंगलबार सुनको मूल्य प्रतितोला २ लाख ५ हजार ९०० रुपैयाँ कायम भएको छ। यो मूल्य हालसम्मकै उच्च हो।

सोमबार प्रतितोला सुन २ लाख ५ हजार ३०० रुपैयाँमा कारोबार भएकोमा आज ६०० रुपैयाँ बढेको हो। चाँदीको मूल्य प्रतितोला १५ रुपैयाँले बढेर २ हजार ४८५ रुपैयाँ पुगेको छ।

महासंघका पूर्वअध्यक्ष माणिकरत्न शाक्यका अनुसार नेपाली उपभोक्ताको मागका कारण नभई विश्व राजनीति र अर्थतन्त्रमा उत्पन्न उतारचढावका कारण सुनको मूल्य बढेको हो।

अन्तर्राष्ट्रिय सञ्चारमाध्यमका अनुसार अन्तर्राष्ट्रिय बजारमा सुन प्रतिऔँस ३ हजार ४९४ अमेरिकी डलरमा कारोबार भइरहेको छ।