बागलुङमा १ करोड लगानीमा खुल्यो साबुन उद्योग

ढोरपाटन– बागलुङमा १ करोड रुपैयाँ लगानीमा साबुन उद्योग सञ्चालनमा आएको छ। काठेखोला गाउँपालिका–७ रेशका तीर्थ गौतम र तारा शर्माले कालिका साबुन उत्पादन गर्दै आएका छन्। 

स्नातकोत्तर उत्तीर्ण उनीहरूलाई विदेश जान भनेर सल्लाह दिनेहरू प्रशस्तै थिए। परिवारकै सदस्यले पनि विदेश जानुको विकल्प देखिँदैन भन्थे। तर तीर्थ र ताराले विदेशको विकल्प रोज्ने होइन, नेपालमै उद्यमी बन्ने सपना देखे।

यतिबेला उनीहरू दुई वर्षको छोरासँगै आफ्नो उद्योगलाई हुर्काइरहेका छन्। स्वदेशमै स्वरोजगार सिर्जना गरेका तीर्थ र ताराको उद्योगमा अहिले ६ जनाले रोजगारी पाएका छन्। बागलुङ बजारको हल्लनचोक नजिकै रहेको टिएन्डटी म्यानुफ्याक्चरिङ उद्योगबाट तीर्थ र ताराले भाँडा र कपडा धुने साबुन उत्पादन गरेर बागलुङको गलकोट, बुर्तिबाङ, कुश्मिसेरा, बरेङ र म्याग्दी र पर्वत जिल्लाका मुख्य शहरमा बिक्री गर्दै आएका छन्। 

२०७८ सालमा पर्यटन तथा उद्योग कार्यालय र बागलुङ नगरपालिकामा उद्योग दर्ता गरेका तीर्थ र ताराले २०८० सालबाट साबुन उत्पादन गरेर बिक्री गर्न थालेका छन्। ५० लाख रुपैयाँ लगानी गरेर शुरू गरेको उद्योगमा अहिले १ करोड रुपैयाँभन्दा बढी लगानी पुगेको छ। निकट भविष्यमा सरफ, हार्पिक र कुलिनसमेत उत्पादन गर्ने लक्ष्य रहेको ताराले बताइन्। 

“अहिले विदेश जाने लहर चलेको छ, तर हामीहरूले यही नै केही गर्नुपर्छ भन्ने सोच बनायौँ र साबुन उद्योग शुरू गरेका हौँ, नयाँ कामको शुरूआत आफैबाट थालनी गर्नुपर्छ भन्ने मान्यता राख्छौँ, यहाँ साबुन उद्योग सञ्चालन हुँदा गाउँठाउँकै स्थानीयले नै रोजगार पाउँछन्।”

साबुन उत्पादनका लागि अधिकांश कच्चा पदार्थ भारत र केही काठमाडौँबाट खरिद गर्ने तीर्थले बताए। आफूहरूले वार्षिक ५० लाख रुपैयाँ बराबरको कारोबार गर्ने उनको भनाइ छ। २०० ग्रामको कपडा धुने कालिका साबुनलाई ५० रुपैयाँमा बिक्री गर्दै आएका छन्। उत्पादनमा मात्र नभएर उत्पादित साबुनको गुणस्तरमा समेत ध्यान दिने गरेको उनले सुनाए।