‘विवेकी राजनेता नहुँदाको परिणाम हो आजको घटना’

काठमाडौँ- पूर्वन्यायाधीश ईश्वरप्रसाद खतिवडाले सोमबार काठमाडौँमा भएको ‘जनसंहारकारी’ घटनाको मुख्य कारण ‘विवेकी राजनेता’ र ‘उत्तरदायी राज्य सञ्चालन प्रणाली’को अभाव भएको बताएका छन्।

‘उकालो’सँगको कुराकानीमा उनले भने, “जेनजी भनेर आएको नयाँ पुस्ताले भ्रष्टाचार नियन्त्रण हुनैपर्ने, सुशासन कायम गर्नुपर्ने र नेताराजको अन्त्य गर्नुपर्ने माग उठाएको थियो।”

खतिवडाका अनुसार, भ्रष्टाचारलाई नियन्त्रण गर्न नसक्नु र हठात् सामाजिक सञ्जाल बन्द गर्नुले समस्यालाई झनै बढाएको हो। “नियन्त्रण गर्नुपर्ने कुरामा नियन्त्रण गरिएन, तर नियन्त्रण गर्न नहुने कुरामा नियन्त्रण खोजियो,” उनले भने। उनले नेपाल अर्को अनिश्चय र अस्थिरताको भुमरीमा धकेलिने बाटोमा रहेको बताए।

विगतदेखि राजनीतिक र अन्य आन्दोलन धेरै पटक भएको र राजनीतिक प्रणाली पटक–पटक परिवर्तन गरिए पनि कुनै विवेकी राजनेता जन्मन नसकेको उनको ठहर छ।

यसैको परिणाम आजको अन्योल र अस्थिरताको उदय भएको पूर्वन्यायाधीश खतिवडाले बताए। “निष्ठा, त्याग र समर्पणको ठाउँमा निहित स्वार्थ, दम्भ र अहंकार बोकेका मानिसहरूबाट धेरै सुन्दर परिकल्पना गर्न सकिँदैन,” उनले भने।