सेनाले लगायो देशभर कर्फ्यु

काठमाडौँ– नेपाली सेनाले देशभर कर्फ्यु आदेश जारी गरेको छ। सेनाको जनसम्पर्क तथा सूचना निर्देशनालयले कर्फ्यु आदेश जारी गरिएको जनाएको छ। 

हाल लागू गरिएको निषेधाज्ञा साँझ ५ बजेसम्म देशभर निरन्तर रहने सेनाले बताएको छ। बिहीबार बिहान ६ बजेसम्म कर्फ्यु  आदेश जारी रहने सेनाले जनाएको छ। 

आन्दोलनका नाममा अराजक व्यक्ति र समूहहरूले घुसपैठ गरी व्यक्तिगत सार्वजनिक सम्पति तोडफोड तथा आगजनी लुटपाट एवं व्यक्तिलक्षित हिंस्रक आक्रमण बलात्कार प्रयास जस्ता क्रियाकलाप गरिरहेको र गर्नसक्ने सम्भावना रहेको हुँदा देशको समग्र शान्ति सुरक्षालाई मध्यनजर राखी निषेधाज्ञा जारी गरिएको सेनाले जनाएको छ। 

निषेधाज्ञा तथा कर्फ्युको समयमा अत्यावश्यक सेवाका सवारी साधनहरू एम्बुलेन्स शववाहन दमकल स्वास्थ्यकर्मी र सुरक्षाकर्मीका सवारी साधनमात्र सञ्चालन हुने जनाइएको छ।