२० अर्ब ७० करोड बराबरको बीमा दाबी

काठमाडौँ– भदौ २३ र २४ गतेको जेनजी आन्दोलनका क्रममा उत्पन्न विषम परिस्थितिका कारण भौतिक संरचनामा पुगेको क्षतिको २० अर्ब ७० करोड ३८ लाख रुपैयाँ बराबरको बीमा दाबी परेको छ।

जेनजीको आन्दोलनका क्रममा सरकारी तथा निजी भौतिक संरचनामा क्षति पुगेको छ। नेपाल बीमा प्राधिकरणका अनुसार विभिन्न १८ वटा निर्जीवन बीमा कम्पनीमा बीमा दाबी भएको छ। प्राधिकरणका अनुसार दि ओरियन्टल इन्स्योरेन्स कम्पनीमा ४० वटा बीमा दाबी परेको छ। त्यसको कूल दाबी रु पाँच अर्ब १४ करोड ७९ लाख ६५ हजार बराबर छ।

सिद्धार्थ प्रिमियर इन्स्योरेन्स कम्पनीमा २५८ को ४ अर्ब ९३ करोड २२ लाख रुपैयाँ, शिखर इन्स्योरन्स कम्पनीमा ३६६ वटा बीमा दाबी परेको छ। कूल दाबी भने २ अर्ब ३९ करोड ४ लाख रुपैयाँ रहेको छ। आईजीआई प्रुडेन्सियल इस्न्योरेन्समा २४ वटा बीमा दाबी परेको छ। सो कम्पनीमा १ अर्ब ५९ करोड ६ लाख रुपैयाँ बराबरको बीमा दाबी परेको प्राधिकरणले जनाएको छ।

सगरमाथा लुम्बिनी इन्स्योरेन्स कम्पनीमा २३३ वटा बीमा दाबी छ। १ अर्ब ४७ करोड ५५ लाख रुपैयाँ बराबरको माग भइआएको छ।

हिमालयन एभरेस्ट इन्स्योरेन्स कम्पनीमा १९६ वटाको आवेदन पर्दा १ अर्ब १५ करोड ६२ लाख रुपैयाँ बराबरको बीमा दाबी परेको छ।

नेको इन्स्योरेन्समा ४० वटाको १ अर्ब ९ करोड ५३ लाख रुपैयाँको माग भएको छ। सानिमा जीआईसीमा १२९ वटाको ७८ करोड ९३ लाख रुपैयाँ बराबरको दाबी छ।

राष्ट्रिय बीमा कम्पनीमा १७२ वटाको ४९ करोड ५१ लाख रुपैयाँ बराबरको बीमा माग भएको छ। युनाइटेड अजोड इन्स्योरेन्स लिमिटेडमा १७० वटाको ४८ करोड ७४ लाख रुपैयाँ, नेपाल इन्स्योरेन्स कम्पनीमा ७९ वटाको ४६ करोड ९४ लाख रुपैयाँ बराबरको बीमा दाबी परेको छ।

एनएलजी इन्स्योरेन्स कम्पनीमा १५१ वटाको ३८ करोड ५८ लाख रुपैयाँ, प्रभु इन्स्योरेन्समा ६९ वटाको १९ करोड १८ लाख रुपैयाँ बराबरको बीमा दाबी भएको छ।

नेसनल इन्स्योरेन्स कम्पनीमा १९ वटाको ६ करोड ८२ लाख रुपैयाँ बराबरको दाबी परेको छ। प्रोटेक्टिभ माइक्रो इन्स्योरेन्स कम्पनीमा ९ वटाको १ करोड १३ लाख रुपैयाँ, स्टार माइक्रो इन्स्योरेन्स कम्पनीमा ६ वटाको ६७ लाख रुपैयाँ, नेपाल माइक्रो इन्स्योरेन्स कम्पनीमा १५ वटाको ५६ लाख ३६ हजार, ट्रष्ट माइक्रो इन्स्योरेन्समा ८ वटाको ४२ लाख रुपैयाँ बराबरको बीमा दाबी भएको छ। प्राधिकरणका अनुसार हालसम्म १ हजार ९८४ वटा बीमा दाबी भएको छ।

नेपाल निर्जीवन बीमा व्यवसायी संघले आन्दोलनका क्रममा भएको क्षतिको दाबी भुक्तानी प्रक्रीया शीघ्र निष्कर्षमा पुर्‍याउन प्रतिबद्ध रहेको जनाएको छ। बीमा गरेका सवारी साधन तथा भौतिक संरचनाको क्षतिको यथार्थ विवरणसहित सम्बन्धित निकायमा प्रक्रिया अघि बढाउन संघले आग्रहसमेत गरेको छ।

वर्तमान अवस्थामा बीमाको महत्व झनै बढेको सन्दर्भमा, बीमा कम्पनीले आफ्नो सामाजिक उत्तरदायित्व पूरा गर्दै बीमितको क्षतिपूर्तिका लागि आवश्यक प्रक्रिया तीव्र रूपमा अगाडि बढाइरहेको संघले जारी गरेको विज्ञप्तिमा उल्लेख गरिएको छ।

बीमित सम्पत्तिमा भएको क्षतिको यथाशीघ्र मूल्यांकन गरी, क्षति विवरणको आधारमा दाबी भुक्तानी प्रक्रिया शीघ्र निष्कर्षमा पुर्‍याउने संघले स्पष्ट पारेको छ।

नेपाल निर्जीवन बीमा व्यवसायी संघले प्रेस विज्ञप्ति जारी गर्दै देशभर जारी आन्दोलनका क्रममा ज्यान गुमाएका प्रति हार्दिक श्रद्धाञ्जलि अर्पण गरेको छ।

आन्दोलनका क्रममा राष्ट्रपतिको भवन, संसद् भवन, सुरक्षानिकाय, प्रशासकीय संरचना, निजी सम्पत्ति, उद्योग, व्यापार, यातायातलगायतका भौतिक संरचनामा भएको क्षतिको गहिरो दुःख व्यक्त गर्दै संघले बीमा कम्पनीलाई यस संकटको समयमा दाबी भुक्तानीलाई प्राथमिकतामा राखेर काम गर्न मातहतका निकायमा आह्वान गरेको छ।

संघका अध्यक्ष राजेन्द्र मल्लले बीमितले आफ्नो क्षतिको विवरणसहित आवश्यक कागजात चाँडो बीमा कम्पनीमा बुझाइ दाबी प्रक्रिया सहज बनाउन अपिल गरेका छन्। साथै, बीमा कम्पनीले पनि दाबी भुक्तानी प्रक्रिया छिटो टुंगोमा पुर्‍याउने उद्देश्यका साथ काम गरिरहेको अध्यक्ष मल्लले बताए।

२०७२ सालको भूकम्प र कोभिड महामारीपछिका अनुभवले बीमाको आवश्यकता र उपयोगितालाई गम्भीर रूपमा महसुस गराएको सन्दर्भमा, हालको परिस्थितिमा बीमा कम्पनीको सक्रियता सकारात्मक र आशाजनक देखिएको उनको भनाइ छ।