अवरुद्ध सडक खुलाउन मन्त्री घिसिङले बोलाए बैठक

काठमाडौँ– मुलुकका विभिन्न स्थानमा  पहिरोका कारण अवरुद्ध सडक खुलाउन सरकारले पहल थालेको छ।

शुक्रबार रातिदेखि पहिरोले अवरुद्ध नारायणगढ–मुग्लिनसहित देशभरका मुख्य सडकमा यात्रु अलपत्र परेपछि भौतिक पूर्वाधार तथा यातायातमन्त्री कुलमान घिसिङले सम्बन्धित निकायका प्रमुखसँग बैठक डाकेका छन्। 

सो बैठकमा दशैँ र तिहारका लागि यातायात व्यवस्थापन तथा अवरुद्ध सडक खुलाउने विषयमा छलफल गरिने र त्यसका लागि कार्यदल बनाउने जनाइएको छ । 

शुक्रबार साँझ करिब ६ः३० बजेदेखि मुग्लिन–नारायणगढ सडक खण्डको तुइन खोला पुलनजिकै निरन्तर झरेको पहिरोका कारण रातभर सडक अवरुद्ध भएको थियो। करिब ७० मिटर  माथिबाट निरन्तर ढुंगा झरिरहेको र शनिबार बिहान  ७ः४० मा पुनः ठूलो पहिरो खसेर सडक अवरुद्ध छ ।

हाल सो स्थानमा तीन वटा ‘लोडर’ र एउटा ‘एक्स्काभेटर’ परिचालन गरी दुवैतर्फबाट पहिरो पन्छाउने काम भइरहेको छ । थप पहिरो नखसेमा कम्तीमा चार घण्टापछि सडक सञ्चालन हुने सम्भावना छ।