टोपबहादुर रायमाझी कारागार फर्किए

काठमाडौँ– जेनजी आन्दोलनका क्रममा कारागारबाट निस्किएका नक्कली भुटानी शरणार्थी प्रकरणका आरोपी पूर्वमन्त्री टोपबहादुर रायमाझी कारागार फर्किएका छन्।

कारागार व्यवस्थापन विभागका निर्देशक चोमेन्द्र न्यौपानेले यही २४ गते कारागारबाट निस्किएका रायमाझी मंगलबार केन्द्रीय कारागारमा उपस्थिति भएको जानकारी दिए। 

नेपाली नागरिकलाई नक्कली भुटानी शरणार्थी बनाएर अमेरिका पठाएको मुद्दामा काठमाडौँ जिल्ला अदालतले रायमाझीलाई पुर्पक्षका लागि कारागार चलान गरेको थियो।

७ हजारभन्दा बढी कैदीबन्दी फर्किए, अझै ७ हजार फरार
कारागार व्यवस्थापन विभागका अनुसार मंगलबारसम्म कारागारबाट भागेका ६ हजार ८४६ तथा सुधारगृहतर्फका ३४१ जनासहित कुल सात हजार १०७ कैदीबन्दी कारागारमा फिर्ता भएका छन्।

पछिल्लो २४ घण्टामा १२३ जना कारागारमा फिर्ता भएका छन्। पछिल्लो तीन दिनमा ७७९ कैदीबन्दी कारागार फिर्ता भएका छन्। कारागार विभागका अनुसार अझै सात हजार ३०६ कैदीबन्दी फरार रहेका छन्। 

गत भदौ २३ र २४ गतेको जेनजी आन्दोलनका क्रममा १४ हजार ५५६ जना कैदीबन्दी भागेका थिए। देशभर ३० हजार ६४० कैदीबन्दी थिए। जेनजी आन्दोलनका क्रममा यही भदौ २४ गते कारागार तोडफोड आगजनी हुँदा कैदीबन्दी भागेका थिए।