भवानीको आराधनामा तलेजु हारको सम्झना (भिडियोसहित)

काठमाडौँ– हरेक वर्ष महानवमीका दिन मात्र खुल्ने तलेजु भवानी मन्दिरको धार्मिक र आध्यात्मिक महिमा सम्झेर वसन्तपुर पुग्ने भक्तजनले त्यहाँबाट करिब ५० वर्षअघि हराएको तलेजु हार पनि सम्झने गरेका छन्।

तलेजुका मूल पुजारी उद्धवमान कर्माचार्य पूजाआजा र प्रार्थनामा तल्लीन रहँदै हरेक दिन हारको महिमा सम्झिने गर्छन्। कान्तिपुरे राजा प्रताप मल्लले १६९८ सालमा तलेजु भवानीलाई चढाएको यो हार २०२७ सालमा हराएको थियो। केही वर्षअघि अमेरिकाको सिकागो म्युजियममा भेटिएपछि यसप्रति सरोकारयुक्त तनाव बढ्दो छ।

मन्दिरका सरसामानको लगत राख्न २०२७ सालमा गठन भएको तलेजु गरगहना छानबिन तथा लगत निर्धारण समितिले काम गरेपछि पनि त्यो हार कसले अमेरिका पुर्‍यायो र कसले बिक्री गर्‍यो भन्ने प्रश्न अनुत्तरित छ।

हारको प्रामाणिकता र उत्पत्तिको पहिचानका लागि करिब १०० वर्ष पुरानो ‘प्रताप मल्ल’ लगत फेला परेपछि, मूल पुजारी कर्माचार्यले यसको प्रमाणित प्रति पुरातत्त्व विभागमा बुझाइसकेका छन्।

उक्त लगतमा ‘चाँदीका पातामा सुनका मलम्बा लाग्याको, पक्का मोतीको घेरा लाग्याको, अष्टमात्रिकाको मूर्ति भयाको, लगनका भगवती देवी भयाको, स्वस्ती श्री राजेन्द्रप्रताप मल्ल भनिएको ठूलो कण्ठी एक’ भन्ने विवरण उल्लेख छ।

“हाम्रो तलेजु हार फिर्ता ल्याउन राज्य लागेकै छैन,” मूल पुजारी कर्माचार्य भन्छन्, “बरु अभियन्ताहरू लागेका छन्, तर राज्य लागेको छैन।”