जेनजी प्रदर्शन: बनेपा नगरपालिकामा १० करोडको क्षति

काभ्रेपलान्चोक– जेनजी प्रदर्शनका क्रममा तोडफोड एवं आगजनीबाट बनेपा नगरपालिमा करिब १० करोड रुपैयाँ बराबरको क्षति भएको छ। 

प्रदर्शनका क्रममा नगरको तीनतले मुख्य प्रशासनिक भवन, योजना शाखा र प्राविधिक शाखा रहेको भवन पूर्ण रूपमा क्षति भएको नगरले जनाएको छ। 

तीनतले प्रशासनिक भवनको पहिलो तलामा रहेको सभाहल, प्रशासकीय अधिकृतको कार्यकक्ष, महिला बालबालिका तथा ज्येष्ठ नागरिक शाखा, प्रशासन, सहकारी तथा सामुदायिक विकास, राजस्व, जिन्सी, दर्ता चलानी शाखा, पुरुष र महिला शौचालय तथा शाखाका कार्यकक्षभित्र रहेका महत्त्वपूर्ण अभिलेख तथा दस्ताबेज पूर्ण रूपमा नष्ट भएको छ। २०४३ सालमा निर्माण भएको मुख्य भवनको ह्रासकट्टीसहितको प्राविधिक मूल्यांकनमा ५ करोड ४२ लाख ५४ हजार रुपैयाँ क्षति भएको जनाइएको हो।

 त्यसैगरी, दोस्रो तलामा रहेका नगरप्रमुख, उपप्रमुख, प्रमुख प्रशासकीय अधिकृतको कार्यकक्ष, गोप्यकक्ष, सचिवालय कक्ष, न्यायिक समितिको इजलास कक्ष, कानून, शिक्षा, लेखा शाखा र दुईवटा शौचालय जलेर पूर्ण रूपमा नष्ट भएको प्राविधिक मूल्यांकनमा उल्लेख छ। यस्तै, तेस्रो तलामा रहेको आन्तरिक लेखा परीक्षण, जिन्सी गोदाम कक्ष र लेखा शाखाका सबै अभिलेख रहेको कक्षसहित सबै सामग्री जलेर नष्ट भएको जनाइएको छ।

योजना र प्राविधिक शाखा रहेको भवनका सबै शाखा तथा कार्यकक्ष र त्यहाँका सम्पूर्ण सामग्री पूर्ण रूपमा जलेर नष्ट भएका छन्। सुरक्षा गार्ड र स्तनपान कक्ष रहेको भवनभित्रका सबै शाखा पनि जलेर नष्ट भएको उल्लेख गरिएको छ। मिनीट्रक ४९ लाख ५० हजार, तीन ट्याक्टरको ४५ लाख, एक टिपरको २५ लाख ९० हजार, एक मोटरसाइकलको १ लाख ४२ हजार ९००, दुई कारको २३ लाख, एक जिपको ५ लाख ८ हजार २६८, पाँच साइकलको ५० हजार रुपैयाँ क्षति भएको छ। 

डेक्सटप कम्प्युटर सेट ४४, ल्यापटप १६, ट्याबलेट १४, २१ मोबाइल, ५३ प्रिन्टर, डिजिटल क्यामेरा तीन, भिडियो क्यामेरा एक, टेलिभिजन तीनलगायत ६१ प्रकारका सामानसहित ८ करोड २२ लाख ४९ हजार बराबरको क्षति भएको उल्लेख छ ।

 नगर कार्यालय तोडफोड, आगजनी तथा लुटपाटमा संलग्नको पहिचान गरी कारबाहीका लागि जिल्ला प्रहरी कार्यालयलाई लिखित जानकारी गराएको नगरप्रमुख शान्तिरत्न शाक्यले बताए। हाल १० नम्बर वडा कार्यालयमा नगर कार्यालय व्यवस्थापन गरी सेवा प्रवाह गरिएको छ।