बसको ठक्करबाट बैतडीमा एकको मृत्यु, विरोधमा राजमार्ग अवरुद्ध

बैतडी–  बसको ठक्करबाट मंगलबार बैतडीमा एक महिलाको मृत्यु भएको छ। 

दशरथचन्द नगरपालिका–२ देहिमाडौँस्थित निंगलाशैनी मन्दिरमा लागेको जात्रा हेरेर फर्किने क्रममा बसको ठक्करबाट वडा नं १ गुरूखोला निवासी ३३ वर्षीया भागरथी लुहार को मृत्यु भएको हो।

जात्राबाट फर्किने क्रममा दशरथचन्द राजमार्गअन्तर्गत गुरुखोलामा महाकाली यातायातको सु.प.प्र. ०२००१ ख १०१७ नम्बरको बसले उनलाई ठक्कर दिएको थियो। उनको घटनास्थलमै मृत्यु भएको जिल्ला प्रहरी कार्यालयका प्रमुख तथा प्रहरी नायब उपरीक्षक (डीएसपी) दीपककुमार रायले जानकारी दिए।

घटनाको विरोधमा मृतकका आफन्त र स्थानीयले राजमार्ग अवरुद्ध गरेका छन्। अहिले सहमति जुटाउन प्रहरी निरीक्षक बलराम पाण्डेयको नेतृत्वमा टोली घटनास्थल पुगेको जिल्ला प्रहरी कार्यालयले जनाएको छ।