कोशी र बागमतीमा भारी वर्षाको सम्भावना

काठमाडौँ– देशभर मनसुनी र स्थानीय वायुको प्रभाव रहेको छ। मौसम पूर्वानुमान महाशाखाका अनुसार लुम्बिनी र कर्णालीका थोरै स्थानमा हल्कादेखि मध्यम वर्षा भइरहेको छ।

दिउँसो सबै प्रदेशमा साधारणतया बदली रहनेछ। कोशी, बागमती, गण्डकी र लुम्बिनीका पहाडी र तराई तथा मधेशका केही स्थानमा मध्यम वर्षाको सम्भावना छ। कोशी र बागमतीका एक-दुई स्थानमा भारी वर्षाको पनि सम्भावना छ।

राति सबै प्रदेशमा साधारणतया बदली रहनेछ। कोशी, गण्डकी र लुम्बिनीका पहाडी र तराई भूभागमा मध्यम वर्षा हुनेछ। 

कोशी, मधेश, बाग्मती, लुम्बिनी र गण्डकीका एक-दुई स्थानमा भारी वर्षाको समेत सम्भावना रहेको महाशाखाले जनाएको छ।