घमी खोलामा डाइभर्सन नहुँदा भन्सारमै थन्किए मालवाहक ट्रली

मुस्ताङ– लोघेकर दामोदरकुण्ड–२ घमी खोलामा सडक डाइभर्सन नहुँदा मुस्ताङ भन्सार कार्यालयमा जाँचपास भइसकेका सिनो हाइड्रो पावर कम्पनीका १८ वटा मालवाहक ट्रली भन्सार कार्यालय न्हेचुङमै थन्किएका छन्।

जोमसोम–कोरला सडकअन्तर्गत घमी खोलामा सडक डाइभर्सन नहुँदा चीनबाट आयात गरिएका उपकरण तथा निर्माण सामग्रीसहितका १० पांग्रे ट्रली मंगलबारदेखि थन्किएका हुन्। 

ट्रलीको भार अस्थायी पुलले थेग्न नसक्ने भएकाले भन्सार कार्यालयमा रोकिएको प्रमुख जिल्ला अधिकारी विष्णुप्रसाद भुसालले जानकारी दिए। 

लोघेकर दामोदरकुण्ड गाउँपालिका अध्यक्ष लोप्साङ छोम्फेल विष्टले कोरला नाका पूर्ण रूपमा सञ्चालनमा आए पनि घमी खोलामा सडक डाइभर्सन नहुँदा समस्या भएको बताए। 

घमी खोलामा निर्माणाधीन पुल सात वर्ष भइसक्दासमेत सम्पन्न हुन सकेको छैन। पुल निर्माणका लागि २०७५ सालमा ६ करोड ८० लाख रुपैयाँ लागतमा हिमढुङ ठोक्कर एन्ड इमोटल जेभी कन्टक्सनले जिम्मा लिएको थियो। 

निर्माण कम्पनीलाई आयोजनाले दैनिक हर्जानासमेत लगाइरहेको भए पनि काम हुन सकेको छैन। एक स्पानको ४० मिटर लामो पुल बनाउने भनिएकामा हालसम्म ७५ प्रतिशत भौतिक प्रगति भएको आयोजनाले जनाएको छ।