महिला टी२० शृंखला: मलेसियामाथि नेपालको जित

काठमाडौँ– अन्तर्राष्ट्रिय महिला टी२० शृंखलाको आफ्नो दोस्रो खेलमा नेपालले मलेसियालाई हराएको छ। 

मलेसियाको क्वालालम्पुरस्थित बायुमास मैदानमा शनिबार भएको खेलमा नेपालले घरेलु टोलीलाई ६ विकेटले हराएको हो। 

मलेसियाले दिएको ९२ रनको लक्ष्य नेपालले १६.२ ओभरमा २ विकेट गुमाउँदै लक्ष्य पूरा गर्‍यो। नेपालका लागि पूजा महतोले सर्वाधिक ३९ रन बनाइन्। त्यस्तै कप्तान इन्दु बर्मा २७ रनमा अविजित रहिन्। रुबी पोद्दारले १५ रन बनाइन्।

मलेसियाकी आयना हमिजाले २ विकेट लिइन्। नुर दानिया स्युहादा र नुर आलियाले समान १ विकेट लिए। 

त्यसअघि टस हारेर पहिले ब्याटिङको निम्तो पाएको मलेसियाले निर्धारित २० ओभरमा ४ विकेट गुमाएर ९१ रन बनाएको थियो। मलेसियाका लागि आइना हमिजाले सर्वाधिक ५० रनको योगदान दिएकी थिइन्। त्यस्तै कप्तान विनिफ्रेड दुरासिंघमले १५ रन बनाइन्।

नेपालकी सोमु विष्टले २ तथा कविता कुँवरले १ विकेट लिए। यससँगै शृंखलामा नेपालले पहिलो जित दर्ता गराएको छ। पहिलो खेलमा नेपाल मलेसियासँग ३ रनले पराजित भएको थियो।

नेपालले आगामी जनवरीमा घरेलु मैदानमा नै हुने आईसिसी महिला टी२० विश्वकप ग्लोबल छनोटको तयारीस्वरुप उक्त शृंखला खेलेको हो।