बितेका १२ घण्टामा सबैभन्दा बढी वर्षा वीरगन्जमा

जल तथा मौसम पूर्वानुमान महाशाखाका अनुसार, वीरगञ्जमा १४३ मिलिमिटर वर्षा भएको छ।

रासस

शनिबार, १८ असोज, २०८२

बितेका १२ घण्टामा सबैभन्दा बढी वर्षा वीरगन्जमा
गएरातिदेखि लगातारको वर्षाले सुनसान देखिएको सर्लाहीको सदरमुकाम मलंगवा बजारको सडक। तस्वीरः विश्वनाथ ठाकुर/रासस

काठमाडौँ– बितेका १२ घण्टामा सबैभन्दा बढी वर्षा पर्साको वीरगन्जमा भएको छ। 

जल तथा मौसम पूर्वानुमान महाशाखाका अनुसार वीरगन्जमा १४३ मिलिमिटर वर्षा भएको छ। बारामा १४०.४, रौतहटको गौर वर्षा मापन केन्द्रमा १२९, रौतहटकै महेशपुरमा १२४ मिलिमिटर वर्षा भएको छ। 

विभागले बारा र पर्सामा भएको वर्षा अति भारी भएको जनाउँदै देशको मध्य क्षेत्रमा बढी वर्षा भएको र तराइ केन्द्रित रहेको, नवलपरासीदेखि पूर्व धनकुटासम्म वर्षा भएको बताएको छ। 

यो अवधिमा सिन्धुपाल्चोकदेखि दोलखासम्म र काठमाडौँ उपत्यकालगायत  १४ वटा जिल्लामा ५० मिलिमिटरभन्दा माथि वर्षा भएको छ। ५० भन्दा बढी मापन केन्द्रहरूमा ३० मिलिमिटरदेखि ५० मिलिमिटरसम्म वर्षा भएको छ। 

हाल देशभर बंगालको खाडीबाट आएको जलवाष्पयुक्त हावाका कारण वर्षा भइरहेको तथा फेरि अर्को प्रणाली पनि सक्रिय हुने सम्भावना बढेकाले शनिबार राति पनि धेरै स्थानमा वर्षा हुने विभागले जनाएको छ।

प्रतिक्रिया दिनुहोस !