वैशाखयताको विपद्‍मा परेर २८५ को मृत्यु, २७ बेपत्ता

काठमाडौँ– यस वर्षको वैशाखयता हालसम्म विभिन्न विपद्जन्य घटनामा परेर २८५ जनाको मृत्यु भएको छ।

आजसम्मको विवरणअनुसार अन्य २७ जना बेपत्ता रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।

प्राधिकरणकी प्रवक्ता शान्ति महतले आइतबार मात्रै ४४ जनाको मृत्यु भएको र पाँच जना बेपत्ता रहेको बताइन्। उनका अनुसार आइतबार सबैभन्दा बढी इलाममा ३७ जनाको पहिरोमा परेर ज्यान गएको छ। पछिल्लो मौसमी प्रणालीबाट ५० जिल्ला प्रभावित भएको उनले जानकारी दिइन्।

प्राधिकरणका अनुसार वैशाखयता सबैभन्दा बढी सर्पदंशबाट मात्रै ८६ जनाको मृत्यु भएको छ। त्यसपछि पहिरोमा परेर ४६ तथा चट्याङबाट ४५ जनाको मृत्यु भएको हो। 

प्राधिकरणले सार्वजनिक गरेको विपद्जन्य घटनाको अभिलेखमा बाढीका कारण ३०, भारी वर्षाबाट ६, आगलागीबाट २३, हावाहुरीका कारण आठ, जनावरको आक्रमणबाट २२ र लेक लागेर १९ जनाको मृत्यु भएको उल्लेख छ। 

यस्तै, बाढीबाट २३ जना, पहिरोका कारण तीन र जनावरको आक्रमणबाट एकजना बेपत्ता भएका छन्। हालसम्म चार हजार ६५ वटा विपद्जन्य घटना भएको र ती घटनामा परेर एक हजार ७२ जना घाइते भएको पनि प्रवक्ता महतले बताइन्। उनका अनुसार कुल ७ हजार २११ परिवार विपद्बाट प्रभावित भएका छन्।