भारतमा १५ अर्ब डलर लगानी गर्ने गुगलको घोषणा, एआई हब निर्माणको तयारी

विश्वप्रसिद्ध प्रविधि कम्पनी गुगलले भारतमा १५ अर्ब डलर पुँजी लगानी गर्ने योजना घोषणा गरेको छ। कम्पनीले आगामी पाँच वर्षभित्र दक्षिणी राज्य आन्ध्र प्रदेशको विशाखापट्टनम शहरमा अमेरिका बाहिरको सबैभन्दा ठूलो आर्टिफिसियल इन्टेलिजेन्स (एआई) हब निर्माण गर्ने जनाएको हो। 

गुगल क्लाउडका प्रमुख कार्यकारी अधिकारी थोमस कुरियनले नयाँदिल्लीमा आयोजित समारोहमा यस हबलाई ‘गिगावाट–स्केल एआई आधार’ का रूपमा विकास गरिने जानकारी दिए। 

“यो गुगलले अमेरिका बाहिर गर्ने सबैभन्दा ठूलो एआई लगानी हो,” उनले भने, “हामीले आगामी पाँच वर्षमा १५ अर्ब डलरको पुँजी लगानी गर्दै यस्तो पूर्वाधार तयार गर्नेछौँ जसले भारतलाई एआई प्रविधिको विश्वव्यापी नक्सामा अग्रस्थानमा पुर्‍याउनेछ।”

कुरियनका अनुसार गुगलले निर्माण गर्न लागेको उक्त एआई केन्द्रलाई अन्ततः धेरै गिगावाट क्षमतामा विस्तार गर्ने योजना छ। यस लगानीले भारतमा तीव्र रूपमा बढिरहेको डिजिटल बजार र एआई उपकरणको मागलाई सम्बोधन गर्नेछ। 

हाल, भारतमा इन्टरनेट प्रयोगकर्ताको संख्या ९० करोड नाघेको छ। जसले व्यवसाय र व्यक्तिगत दुवै तहमा प्रविधिको प्रयोगलाई नयाँ उचाइमा पुर्‍याएको छ।

भारतका सूचना प्रविधिमन्त्री अश्विनी वैष्णवले गुगलको लगानीप्रति धन्यवाद ज्ञापन गरेका छन्। “यो डिजिटल पूर्वाधार हाम्रो ‘भारत एआई’ दृष्टिकोणका लक्ष्य पूरा गर्नको दिशामा महत्त्वपूर्ण कोसेढुंगा सावित हुनेछ। यसले भारतलाई एआई प्रविधिको उत्पादन र नवप्रवर्तन केन्द्रका रूपमा स्थापित गर्न मद्दत पुर्‍याउनेछ,” उनले भने।

त्यसैगरी, आन्ध्र प्रदेशका मुख्यमन्त्री चन्द्रबाबु नायडूले यो परियोजनालाई राज्यका लागि एक ऐतिहासिक र अत्यन्त खुशीको दिनका रूपमा वर्णन गरेका छन्। राज्यका प्रविधिमन्त्री नारा लोकेशले यो लगानी एक वर्षको गहन छलफल र अथक प्रयासपछि सम्भव भएको बताए। “यो केवल शुरूआत हो, हाम्रो राज्यको डिजिटल भविष्य, नवीनता र विश्वव्यापी प्रतिष्ठाका लागि यो एक ठूलो छलाङ हो,” उनले भने।

गुगलको यो निर्णय भारतमा तीव्र रूपमा विकसित भइरहेको एआई बजारप्रति अन्तर्राष्ट्रिय कम्पनीको बढ्दो चासोको अर्को उदाहरण बनेको छ। यसै महिना अमेरिकी एआई स्टार्टअप एन्थ्रोपिकका प्रमुख कार्यकारी अधिकारी डारियो अमोदेईले प्रधानमन्त्री नरेन्द्र मोदीलाई भेट्दै अर्को वर्ष भारतमा आफ्नो कार्यालय स्थापना गर्ने घोषणा गरेका थिए। 

एन्थ्रोपिकको यो निर्णयपछि अन्य शीर्ष एआई कम्पनीले पनि भारतीय बजारमा आफ्नो उपस्थिति विस्तार गर्ने घोषणा गरेका छन्। ओपनएआईले यस वर्षको अन्त्यमा भारतमा आफ्नो कार्यालय खोल्ने तयारी गरेको जनाएको छ। यसका प्रमुख साम अल्टम्यानका अनुसार भारतमा च्याटजीपीटीको प्रयोग गत वर्षको तुलनामा चार गुणा बढेको छ।

यस्तै, एआई कम्पनी पप्र्लेक्सिटीले गत जुलाईमा भारतीय टेलिकम कम्पनी एयरटेलसँग साझेदारी गरेको थियो। जसअनुसार एयरटेलका ३६ करोड ग्राहकलाई एक वर्षका लागि पप्र्लेक्सिटी प्रोको निःशुल्क सदस्यता प्रदान गरिएको छ।

गुगलको यो १५ अर्ब डलरको लगानीसँगै भारत एआई प्रविधिको प्रमुख केन्द्र बन्ने मात्र नभई यसले देशको डिजिटल पूर्वाधार, रोजगारी र अनुसन्धान क्षेत्रमा समेत नयाँ अध्याय खोल्ने अपेक्षा गरिएको छ। (रासस/एएफपी)