मधेशमा बुधबार ४ बजेसम्म मुख्यमन्त्रीका लागि दाबी पेस गर्न आह्वान

जनकपुर– मधेश प्रदेश प्रमुख सुमित्रा सुवेदी भण्डारीले प्रदेशको मुख्यमन्त्री पदमा नियुक्तिका लागि दाबी पेश गर्न आह्वान गरेकी छन्। प्रदेश प्रमुखको कार्यालयले मंगलबार विज्ञप्ति जारी गर्दै बुधबार दिउँसो ४ बजेभित्र दाबी पेस गर्न आह्वान गरेको जनाएको छ।

प्रदेश प्रमुखसमक्ष मुख्यमन्त्री सतिशकुमार सिंहले दिनुभएको राजीनामा स्वीकृत भइसकेकाले प्रदेशसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई दाबी पेस गर्न आह्वान गरिएको हो।

विज्ञप्तिमा भनिएको छ,“नेपालको संविधानको धारा १६९ उपधारा (१) को खण्ड (क) अनुसार माननीय मुख्यमन्त्री सतिशकुमार सिंहले पदबाट दिनुभएको राजीनामा प्रदेश प्रमुखले स्वीकृत गर्नुभएकाले नेपालको संविधानको धारा १६८ को उपधारा (२) बमोजिम प्रदेशसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई असोज २९ गते बुधबार दिउँसो ४ बजेभित्र आफ्नो दाबी पेश गर्न आह्वान गर्नुभएको व्यहोरा जानकारीका लागि अनुरोध छ।”