स्वच्छ निर्वाचनका लागि सरकार, आयोग र दलबीच त्रिपक्षीय संवादमा जोड

काठमाडौँ– आगामी फागुन २१ गतेका लागि तोकिएको प्रतिनिधिसभा सदस्यको निर्वाचन स्वच्छ, निष्पक्ष र स्वतन्त्र रूपमा सम्पन्न गर्नका लागि सरकार, निर्वाचन आयोग र राजनीतिक दलबीच त्रिपक्षीय संवादको आवश्यकतामा दलहरूले जोड दिएका छन्।

आसन्न निर्वाचनका विषयमा बिहीबार आयोगले राजनीतिक दलहरूसँग गरेको छलफलमा सहभागीहरूले सरकारले दलहरूसँग समन्वय गर्नुपर्ने र निर्वाचनको पूर्ववातावरण तयार गर्नुपर्ने बताएका हुन्।

छलफलमा सहभागी नेपाली कांग्रेसका नेता मीन विश्वकर्माले जेनजी आन्दोलनको मर्मलाई आत्मसात् गर्दै प्रतिशोधको भावना हटाएर निर्वाचनको वातावरण बनाउनुपर्ने उल्लेख गरे।

विशेष परिस्थितिमा बाटो बिराएको संविधानलाई सही बाटोमा ल्याउने एक आधार निर्वाचन हुनसक्ने भए पनि सरकारले हालसम्म सहज वातावरण सिर्जनाका लागि आफूहरूसँग समन्वय नगरेको असन्तुष्टि व्यक्त गरे।

नेकपा एमालेका उपाध्यक्ष गुरुप्रसाद बरालले दलका नेतालाई स्थान हद तोक्ने, राहदानी रोक्का गर्ने तथा जुलुस र सभा गर्न नदिनेजस्ता सरकारी निर्णयहरू निर्वाचनको वातावरणका लागि बाधक भएको धारणा राखे। उनले फरार कैदीलाई नियन्त्रणमा लिन र लुटिएका हतियार जफत गरी समाजमा शान्ति सुव्यवस्था कायम गर्न माग गरे।

नेकपा  माओवादी केन्द्रका नेता देवप्रसाद गुरुङले जे–जसरी निर्वाचन घोषणा भए पनि आफूहरू निर्वाचनमा जान तयार भएको तर सरकारले दलहरूलाई विश्वासमा लिन नसकेको टिप्पणी गरे। उनले सरकारले राष्ट्रिय सुरक्षा दिन सकेमा मात्र निर्वाचन सफल हुने बताए।

कतिपय साना दलका प्रतिनिधिले सरकार र आयोगले ठूला दललाई मात्र अनुकूल व्यवहार गर्दै आएको गुनासो गर्दै अबका दिनमा त्यस्तो नगर्न आयोगको ध्यानाकर्षण गराए।

आयोगले विघटित प्रतिनिधिसभामा प्रतिनिधित्व गर्ने तथा गत निर्वाचनका कम्तीमा एक वडा सदस्यसम्म विजय हासिल गरेकासहित २९ दललाई छलफलमा बोलाएको थियो।

छलफलमा प्रतिनिधिसभा सदस्य निर्वाचन प्रयोजनका लागि दल दर्ता, आगामी माघ ११ मा प्रस्तावित राष्ट्रियसभाको १८ सदस्यको निर्वाचन, मतदाता नामावली, मतदातास्थल तथा मतदान केन्द्र र राजनीतिक दलसँग आयोगले राखेको अपेक्षाका विषयमा छलफल गरिएको थियो।