चितवनमा ७ वटा सवारीसाधन एकापसमा ठोक्किँदा २१ जना घाइते

चितवन– भरतपुर महानगरपालिका–२९ गाइघाटमा सातवटा सवारीसाधन एकापसमा ठोक्किँदा २१ जना घाइते भएका छन्। 

जिल्ला प्रहरी कार्यालय चितवनका प्रहरी नायब उपरीक्षक रवीन्द्र खनालका अनुसार शनिबार बिहान ७ः३० बजे उक्त दुर्घटना भएको हो। घाइतेहरूको चितवन मेडिकल कलेज, जनता केयर अस्पताल र नेसनल सिटी अस्पतालमा उपचार भइरहेको छ।

मुग्लिङबाट नारायणगढतर्फ आउँदै गरेको ना८ख ६६२९ नम्बरको ट्रक र विपरीत तर्फबाट जाँदै गरेको बा४ख ७४२० नम्बरको बस, बसको पछाडि ना७ख ९६०७ नम्बरको  टेलर, त्यस पछाडि बा प्र ०६–००१ ग ०४८४ नम्बरको माइक्रो, त्यस पछाडि ग२ख १६२६ नम्बरको बस, त्यस पछाडि ना३च ३२५६ नम्बरको बलेरो र त्यस पछाडि बिएबी ८४७० नम्बरको कार ठक्कर खाएका हुन्।

घाइतेमध्ये १३ जना नेसनल सिटी अस्पतालमा, चार जना चितवन मेडिकल कलेजमा र चार जनाको जनता केयर अस्पतालमा उपचार भइरहेको छ। घटनाको थप विवरण आउन बाँकी रहेको छ।