‘सडकमा प्रदर्शन नगरौँ, सरकार संवादका लागि तयार छ’

काठमाडौँ– गृहमन्त्री ओमप्रकाश अर्यालले विभिन्न माग राखेर सडक प्रदर्शनमा रहेका समूहलाई संवादका लागि आग्रह गरेका छन्। 

प्रधानमन्त्री निवास बालुवाटारमा सुरक्षा निकायका प्रमुखसहितको छलफलपछि रासससँगको कुराकानीमा उनले सरकार संवादका लागि तयार रहेको बताएका हुन्।

“राजनीतिक माग सरकारले संवादको माध्यमबाट सम्बोधन गर्छ। संवादमा आउनुपर्‍यो। संवाद गर्न सरकार तयार छ। सडकमा जानु जरुरी छैन,” गृहमन्त्री अर्यालले भने। 

लोकतान्त्रिक अधिकार प्रयोग गर्दा अरूको अधिकार हनन नहुनेतर्फ प्रदर्शनकारी सचेत हुनुपर्ने उनको भनाइ छ।

“सार्वजनिक र निजी सम्पत्तिमा क्षति पुर्‍याउनु भएन। कहीँकतै हिंसात्मक गतिविधि हुनु भएन। विभिन्न राजनीतिक शक्ति र आन्दोलनकारीलाई सरकारको अनुरोध हो,” गृहमन्त्री अर्यालले भने।

उनले बालुवाटार सुरक्षा बैठकमा मुलुकको पछिल्लो सुरक्षा अवस्थाको सूक्ष्म विश्लेषण भएको जानकारी दिँदै सुरक्षा स्थितिलाई सामान्य अवस्थामा फर्काउँदै चुनावको वातावरण बनाउन सरकार केन्द्रित रहेको बताए।