रूसद्वारा आणविक क्षमतायुक्त क्रुज मिसाइल ‘ब्युरेभेस्टनिक’को सफल परीक्षण

रूसी राष्ट्रपति भ्लादिमिर पुटिनले आइतबार देशले विकास गरेको आणविक–शक्ति सञ्चालित क्रुज मिसाइल ‘ब्युरेभेस्टनिक’को अन्तिम सफल परीक्षण सम्पन्न भएको औपचारिक घोषणा गरेका छन्। उनले यस मिसाइललाई ‘संसारमा अद्वितीय र अतुलनीय सिर्जना’ भन्दै यसको रणनीतिक क्षमताको प्रशंसासमेत गरे।

क्रेमलिनले सार्वजनिक गरेको भिडियो सन्देशमार्फत युक्रेन युद्धबीच आयोजित उच्चस्तरीय सैनिक बैठकलाई सम्बोधन गर्दै पुटिनले भने, “निर्णायक परीक्षणहरू अब पूर्ण भएका छन् र म रूसी सशस्त्र सेनामा यस हतियारलाई सेवामा राख्नका लागि आवश्यक पूर्वाधार निर्माणको आदेश दिन्छु।”

पुटिनका अनुसार, ‘ब्युरेभेस्टनिक’ मिसाइलको ‘असीमित दायरा’ रहेको छ। यो ‘रूसी वैज्ञानिक र इन्जिनियरहरूको अद्वितीय उपलब्धि’ हो। उनले यसलाई विश्वमा अन्य कुनै देशसँग तुलना गर्न नसकिने ‘असाधारण प्राविधिक उपलब्धि’ का रूपमा वर्णन गरे।

रूसी सेनाका प्रमुख भ्यालेरी गेरासिमोभले अक्टोबर २१ मा सम्पन्न अन्तिम परीक्षणमा मिसाइलले करिब १४ हजार ००० किलोमिटर दूरी तय गर्न लगभग १५ घण्टा उडान भरेको जानकारी दिए। उनका अनुसार यो दूरी मिसाइलको अधिकतम सीमा नभएको र अझ टाढासम्म प्रहार गर्न सक्ने क्षमता प्रमाणित भएको छ।

गेरासिमोभले थप विवरण दिँदै भने, “ब्युरेभेस्टनिकको प्राविधिक विशेषताहरूले यसलाई कुनै पनि दूरीमा अवस्थित अत्यधिक संरक्षित लक्ष्यविरुद्ध उच्च परिशुद्धताका साथ प्रयोग गर्न सक्षम बनाउँछ।”

राष्ट्रपति पुटिनले सन् २०१८ मै पहिलोपटक उक्त मिसाइल विकास योजनाको घोषणा गरेका थिए। उक्त परियोजना त्यसबेलादेखि नै रूसको लामो दूरी र रणनीतिक प्रतिरोध क्षमताको प्रतीकको रूपमा हेरिँदै आएको छ।

रूसी रक्षा मन्त्रालयका अनुसार ब्युरेभेस्टनिकले परम्परागत क्रुज मिसाइलभन्दा निकै लामो दायरा, उच्च गतिशीलता र आणविक ऊर्जा स्रोतबाट सञ्चालित निरन्तर उडान क्षमताको संयोजन प्रस्तुत गर्दछ। यस मिसाइलको सफल परीक्षणसँगै रूसले आफ्नो आणविक प्रतिरोध क्षमतालाई नयाँ स्तरमा पुर्‍याएको छ। यसले विश्व शक्तिहरूबीचको सामरिक सन्तुलनमा नयाँ अध्याय थप्ने सम्भावना देखिएको छ।