कृषक भन्छन्– वर्षाले धान मात्रै होइन हाम्रो मिहिनेत पनि बगायो

रुपन्देही– सम्मरीमाई गाउँपालिका–६ स्थित अवधपुरका किसान सङ्ग्राम केवट धान भित्र्याउने र नयाँ बाली रोप्ने समयमा भएको बेमौसमी वर्षाले धानबालीमा क्षति पुर्‍याएपछि चिन्तित बनेका छन्।

केवटले भने, “बाली स्याहार्ने समयमा वर्षा भएपछि ठूलो क्षति भएको छ, वर्षाले धान मात्रै होइन हाम्रो मेहनत पनि बगाएको छ।” 

उनले घाम नलाग्दा करिब २५ प्रतिशत धानमा टुसा उम्रेर कुहिने अवस्थामा पुगेको बताए। “मेसिन चलाउने अवस्था छैन, खेत पूरै हिलाम्य भएको छ। हसियाँले धान काट्दा खर्च दोब्बर भइरहेको छ,” उनको गुनासो छ।

धान भित्र्याउने र नयाँ बाली लगाउने समयमा परेको बेमौसमी वर्षाले रुपन्देहीको मर्चवार क्षेत्रका किसानलाई थप चिन्तित बनाएको छ।

किसान रामप्रसाद चौधरीले धान भित्र्याउने र त्यसपछि गहुँ रोप्ने तयारीमा रहे पनि तत्काल सम्भव नदेखिएको बताए। उनले भने, “माटोमा पानी जति रह्यो, बीउ राख्न पनि ढिला हुन्छ। बैमौसमी वर्षाले हामी किसानले गरेको मेहनतमाथि ठूलो खेलवाड नै भएको जस्तो लाग्छ।”

लामो समयदेखि हसियाँले धान काटेर भित्र्याउने किसान अब भने नयाँ प्रविधिको प्रयोग गर्न थालेका छन्। कम समयमा धेरै धान काट्न सकिने हुनाले उनीहरूले कम्बाइन हार्भेस्टर को प्रयोग गर्दै आइरहेका छन्। तर, खेत भिजेका कारण कम्बाइन मेसिन चलाउन नसकिएको र हसियाँले नै धान काट्नुपर्ने बाध्यता आएको किसानको गुनासो छ। मजदुर अभाव हुनुका साथै लागत पनि बढेको उनीहरूको भनाइ छ।

“हामी किसानका लागि खेती केवल पेसा होइन, हाम्रो जीवन हो। तर, हरेक वर्ष सिँचाइको पर्याप्त सुविधा नभएका कारण आकाशे पानीको भरोसामा रहनुपर्ने बाध्यता पनि छ,” किसान मिथिलादेवी केवटले गुनासो गरिन्।

त्यसै गरी नयाँ सिजनको तयारीस्वरूप रोपिएका तरकारीका बेर्ना (बिरुवा) पनि पानीमा डुबेर बिग्रिने खतरा देखिएको छ। किसानले करिब २५ प्रतिशतसम्म क्षति हुने अनुमान गरेका छन्।

कोटहीमाई गाउँपालिकाका सहायक कृषि विकास अधिकृत गिरिजा पाण्डेयका अनुसार कम चिस्यान भएका खेतका लागि यो वर्षा केही हदसम्म फाइदाजनक भए पनि काट्ने अन्तिम चरणमा रहेका धानबालीमा आंशिक क्षति पुगेको पुष्टि भएको छ। उनले भने, “धान भित्र्याउने किसानलाई नोक्सान पुगेको छ। तर, गहुँ र सागसब्जीका लागि केही लाभ पुग्छ।”

किसानका लागि अहिले राहतभन्दा बढी चिन्ता छाएको छ। हरेक वर्ष बेमौसमी वर्षा, धान रोप्ने बेला मलको अभाव र उत्पादनको उचित बजार मूल्य नपाउँदा किसानमा चिन्ता बढेको छ। कृषिप्रधान देशमा कृषि क्षेत्रको विकासका लागि तीनै तहको सरकारले ध्यान दिनुपर्ने कोटहीमाई गाउँपालिका–१ का हृदयराम गुप्ताले बताएका छन्।