मूल्य खस्किएपछि समस्यामा दाङका अदुवा किसान

घोराही– दाङको तुलसीपुर उपमहानगरपालिका–१९ छिल्लीकोटका किसान विकास खड्काको बारीमा अनुमानित ५० क्विन्टल अदुवा छ। यतिबेला बारीको अदुवा खनेर बजार पठाइसक्नु पर्ने हो। तर बजार भाउ नभएका कारण खड्काले अदुवा अझै खनेका छैनन्। 

गत वर्ष यही याममा ५५ देखि ६० रुपैयाँ प्रतिकिलो अदुवा बेचेका खड्कालाई अहिले बजार भाउले निकै खिन्न बनाएको छ। बजार भाउ ३० देखि ३५ रुपैयाँ रहेका कारण अदुवा खन्ने जाँगर नलागेको उनले बताए। 

अन्य कृषि बाली छोडेर अदुवा रोपेका उनी भाउ नपाउँदा निराश छन्। “यो वर्ष अदुवा बिक्रीबाट लगानी पनि नउठ्ने अवस्था छ,” उनी भन्छन्। बेमौसमी वर्षाले पनि अदुवामा केही क्षति गरेको छ। गत वर्ष उनले २ लाख रुपैयाँको अदुवा बिक्री गरेका थिए। 

छिल्लीकोटकै पलबहादुर खड्काले पनि गत वर्ष अदुवाले भाउ पाएको देखेर यसपालि ५० हजार रुपैयाँको बीउ किनेर अदुवा लगाए। तर अहिले भाउ सुनेर उनी पनि निराश छन्। 

बीउ किन्दाखेरिकै ५० हजारको सावाँब्याज अहिले ६५ हजार पुगेको छ। अदुवाको बीउ किन्दा लिएको ऋणको साँवाब्याज कसरी तिर्ने भन्ने पिरलो उनलाई छ। 

बजारमा व्यापारीले सस्तोमा भारतबाट अदुवा भित्र्याउँदा स्थानीयले उत्पादन गरेको अदुवा बिक्री नहुने अवस्था भएको किसानको भनाइ छ। “अहिलेको अवस्थामा रहेको मूल्यमा अदुवा बिक्री गर्दा ऋण तिर्न पनि पुग्दैन,” उनले भने। पहाडी क्षेत्रमा जंगली जनावरले क्षति नगर्ने र राम्रो आम्दानी हुने भएपछि अधिकांश किसानले अदुवा रोप्ने गरेका छन्। तर मूल्य नपाउँदा किसान मर्कामा परेको स्थानीय पूर्णबहादुर पुनले बताए। 

उनका अनुसार गाउँमा ३५ घरले अदुवाखेती गर्ने गरेका छन्। छिल्लीकोट क्षेत्रबाट मात्रै वार्षिक ६०० क्विन्टलभन्दा बढी अदुवा बिक्री हुने गरेको छ। अदुवाको बजारीकरणमा स्थानीय सरकारले सहयोग गरेमा सहज हुने उनीहरूको भनाइ छ।