फोटो काठमाडौँको छैटौँ संस्करण आजदेखि शुरू

काठमाडाैँ– नेपालको अन्तर्राष्ट्रिय फोटोग्राफी महोत्सव 'फोटो काठमाडौँ'को छैटौँ संस्करण आजदेखि काठमाडौँमा शुरू भएको छ।

काठमाडौँ उपत्यकाका विभिन्न ठाउँमा एक महिनासम्म (कात्तिक २८ – मंसिर २८) चल्ने यो महोत्सवमा १८ वटा प्रदर्शनी, स्लाइड सो प्रोजेक्सन, कार्यशाला, कलाकारसँग वार्ता, प्यानल छलफल, पोर्टफोलियो समीक्षा र चलचित्र प्रदर्शनी रहनेछन्।

काठमाडौँको नेपाल कला परिषद् यस महोत्सवको मुख्य स्थलको रूपमा महिनाभरका लागि रहनेछ। महोत्सवले पाटनको मङ्गाहिति र च्यासल, कीर्तिपुरस्थित त्रिभुवन विश्वविद्यालय, नक्सालको नन्दीकेशर बगैँचा र थिमि (मध्यपुर)को निगू पुखुमा पनि यात्रा गर्नेछ।

यस वर्षको संस्करणले 'ग्लोबल साउथ' ऐक्यबद्धताको 'क्युरेटोरियल' विषयवस्तुसम्बन्धी गतिशील कायक्रम प्रस्तुत गर्ने आयोजक फोटो केटीएमले जनाएको छ।

"यस वर्षको भेलाले तेस्रो विश्वका कलाकारहरू र सांस्कृतिक समुदायहरूबीच सांस्कृतिक समझदारीलाई गहिरो बनाउनेछ, हाम्रो इतिहास, कथा, संघर्ष र आशाहरू साटासाट गर्दै पारस्परिक अन्तर्राष्ट्रिय एकतालाई बलियो बनाउनेछ र भौगोलिक सीमा पार गर्दै दक्षिण-दक्षिणबीचको अधिक सहकार्य र आदानप्रदानको बाटो पनि खोल्नेछ भन्नेमा हामी आशावादी छौँ," – महोत्सव निर्देशक नयनतारा गुरुङ कक्षपतिले भनिन्।

यस महोत्सवका सबै प्रदर्शनी, प्रोजेक्शन, वार्ता र गतिविधि सर्वसाधारणका लाग नि:शुल्क तथा खुला रहेका छन्। महोत्सव कार्यक्रमबारे यहाँ क्लिक गरेर विस्तृतमा बुझ्न सकिन्छ।