पाँच प्रदेश सांसदलाई पदमुक्त नगर्न सर्वोच्चको आदेश

जनकपुरधाम– मधेश प्रदेशका पाँच प्रदेशसभा सदस्यलाई पदमुक्त नगर्न सर्वोच्च अदालतले आदेश दिएको छ।

सभामुख रामचन्द्र मण्डलले गत कात्तिक २७ गते जनता समाजवादी पार्टी नेपाल र नागरिक उन्मुक्ति पार्टीका पाँच प्रदेशसभा सदस्यहरूलाई पदमुक्त गरेका थिए।

सर्वोच्च अदालतका न्यायाधीश नित्यानन्द पाण्डेयको एकल इजलासले मधेश प्रदेशसभाका सभामुख मण्डललाई ती पाँच प्रदेशसभा सदस्यलाई तत्काल पदमुक्त नगर्न आदेश दिएको हो।

पदमुक्त गरिएका प्रदेशसभा सदस्यहरूमा जनता समाजवादी पार्टी नेपालका मनीषकुमार सुमन, सञ्जयकुमार यादव, सिंहासन साह कलवार र शारदा शंकर साह कलबनर तथा नागरिक उन्मुक्ति पार्टीकी उर्मिला सिंह थिए।

उनीहरूलाई प्रदेशसभाको बैठकमा लगातार १० दिन अनुपस्थित रहेको भन्दै पदमुक्त गरिएको थियो। सभामुखको निर्णयविरुद्ध पदमुक्त भएका प्रदेशसभाका सदस्यहरूले सर्वोच्च अदालतमा रिट दायर गरेका थिए।