फ्लोरिडामा युक्रेन–अमेरिका उच्चस्तरीय वार्ता

अमेरिकी राष्ट्रपति डोनाल्ड ट्रम्पको आग्रहपछि युक्रेन–रुस युद्धमा मध्यस्थता गर्न दबाब बढाइरहेका ट्रम्प प्रशासनका उच्च अधिकारी र युक्रेनी वार्ताकार फ्लोरिडामा वार्तामा बसेका छन्। 

यस वार्ताले मस्कोमा रुसी राष्ट्रपति भ्लादिमिर पुटिनसँग हुने महत्त्वपूर्ण छलफलका लागि आधार तय गर्ने लक्ष्य राखेको जनाइएको छ। बैठकमा अमेरिकी विदेशमन्त्री मार्को रुबियो, राष्ट्रपति ट्रम्पका विशेष दूत स्टिभ विटकफ तथा ज्वाइँ जारेड कुसनरले युक्रेनी प्रतिनिधिमण्डलसँग प्रस्तावित शान्ति संरचनाको मुख्य बुँदालाई थप स्पष्ट पार्न विस्तृत छलफल गरिरहेका छन्। सन् २०२२ मा शुरू भएको रुसी आक्रमणविरुद्ध हाल युक्रेनले प्रतिरक्षा मोर्चामा दबाब बढाइरहेको अवस्थामा युक्रेनका लागि अत्यन्तै संवेदनशील घडीमा वार्ता भएको हो।

यही बीचमा, फ्लोरिडा वार्ताको पूर्वसन्ध्यामा युक्रेनी राष्ट्रपति भोलोदिमर जेलेन्स्कीले आफ्नो शक्तिशाली चिफ अफ स्टाफ एन्ड्री यर्माकले पदत्याग गरेको घोषणा गरेका छन्। यर्माक वार्ताका प्रमुख प्रतिनिधिका रूपमा रहेका थिए। उनको निवासमा भ्रष्टाचारविरोधी अनुसन्धानकर्ताले छापा मारेपछि उत्पन्न परिस्थितिले जेलेन्स्की सरकारमाथि थप आन्तरिक दबाब सिर्जना गरेको छ। 

रुबियो र यर्माकबीच जेनेभामा भेट भएको एक हप्तामात्रै भएको थियो। जसमा दुवै पक्षले संशोधित शान्ति योजनामा भएको प्रगति सकारात्मक रहेको बताएका थिए। अहिले वार्ता टोलीमा युक्रेनका सशस्त्र बलका प्रमुख एन्ड्री हेनाटोभ, विदेशमन्त्री एन्ड्री सिबिहा तथा सुरक्षा परिषद्का प्रमुख रुस्टेम उमरोभ छन्। 

वासिंटन र मस्कोबीच विकसित गरिएको ट्रम्पको २८ बुँदे प्रस्तावित योजना परिमार्जनमा वार्ताकारहरूको ध्यान केन्द्रित छ। योजनाको प्रारम्भिक ढाँचाले डोनबासको सम्पूर्ण क्षेत्र रुसलाई हस्तान्तरण गर्ने कल्पना गरेको थियो। जुन युक्रेनका लागि सर्वाधिक विवादित विन्दु बनेको छ। 

प्रस्तावमा युक्रेनको सेनाको आकारमा सीमा निर्धारण गर्ने, नाटोमा सदस्यता नदिनेजस्ता प्रावधान थिए। १०० दिनभित्र निर्वाचन गर्नुपर्ने बाध्यता पनि समावेश थियो। वार्ताकारहरूले केही बुँदामा परिमार्जन भएको संकेत गरिरहेका छन्, तर परिवर्तनको स्पष्ट स्वरूप खुलाइएको छैन ।

राष्ट्रपति जेलेन्स्कीले सामाजिक सञ्जाल एक्समा युक्रेनी प्रतिनिधिमण्डलले युद्ध अन्त्यका लागि आवश्यक कदम छिटो र प्रभावकारी रूपमा अघि बढाउने आशा व्यक्त गरेका छन्। (रासस/एपी)