प्रधानमन्त्रीको रोहबरमा एनआरएनएबीच एकताको घोषणा

काठमाडौँ– गैरआवासीय नेपाली संघ (एनआरएनए) बीच आइतबार एकताको घोषणा भएको छ। प्रधानमन्त्री सुशीला कार्कीको उपस्थितिमा महेश श्रेष्ठ र डा. बद्री केसीले एकता सम्बन्धी सहमति पत्रमा हस्ताक्षर गरेका हुन्।

पछिल्ला केही वर्षदेखि श्रेष्ठ र केसीको नेतृत्वमा दुई समिति क्रियाशील थिए। मुलुकमा फेरिएको परिस्थितिबीच दुवै संस्थाको नेतृत्व १० बुँदे सहमति गर्दै एकताबद्ध हुन तयार भएको हो।

एकतापछि २०८३ वैशाख ४ सम्ममा १२औँ महाधिवेशन गर्ने सहमति जुटेको छ। केसी नेतृत्वको कार्यसमिति श्रेष्ठको नेतृत्वमा एकता महाधिवेशनमा जान तयार भएको छ।

महाधिवेशनलाई पारदर्शी एवं विश्वासयोग्य बनाउन ११ सदस्यीय स्टेयरिङ कमिटी गठन गर्ने, त्यस्तो कमिटीमा रहेका व्यक्ति १२औँ महाधिवेशनमा उम्मेदवार नहुनेजस्ता सहमति जुटेको छ ।

‘सदस्यता व्यवस्थापनको पारदर्शिता तथा निष्पक्षताका लागि महासचिव गौरिराज जोशी र बाबुराम लामालाई पूर्ण अधिकार दिनेगरी एक अलग सिस्टम म्यानेजमेन्ट कमिटी गठन गर्नेछ,’ सहमतिपत्रमा उल्लेख छ।