‘गोरखापत्र एकेडेमी’ सञ्चालन गर्दै गोरखापत्र संस्थान

काठमाडौँ– गोरखापत्र संस्थानले नेपाली पत्रकारिताको गुणस्तर र व्यावसायिकता अभिवृद्धिका लागि ‘गोरखापत्र एकेडेमी’ सञ्चालन गर्ने भएको छ। संस्थानको ऐतिहासिक विरासतलाई निरन्तरता दिँदै पत्रकारिता क्षेत्रमा नेतृत्वदायी भूमिका निर्वाह गर्ने उद्देश्यले एकेडेमी स्थापना गरिएको हो।

संस्थानले एकेडेमीमार्फत पत्रकारिता क्षेत्रका लागि आवश्यक पर्ने जनशक्ति विकास, समसामयिक अध्ययन, अनुसन्धान, तालिम, तथा पुस्तक र जर्नल प्रकाशन जस्ता कार्यहरू सञ्चालन गर्ने जनाएको छ।

संस्थानका महाप्रबन्धक लालबहादुर ऐरीको अध्यक्षतामा बसेको सञ्चालक समितिको मंसिर १२ गतेको बैठकले एकेडेमी स्थापनाको निर्णय गरेको हो। यो निर्णय गोरखापत्र संस्थान ऐन, २०१९ को दफा १७ (६) ले तोकेको सीमाभित्र रहेर कार्यान्वयन गरिने निमित्त निर्देशक ताराबहादुर बस्यालले जानकारी दिए। बैठकले ‘गोरखापत्र एकेडेमी सञ्चालन सम्बन्धी कार्यविधि, २०८२’ समेत स्वीकृत गरेको छ।

कार्यविधि अनुसार, एकेडेमीले संस्थानका प्रकाशनको गुणस्तर सुधार र जनशक्तिको व्यावसायिक क्षमता विकासका कार्य गर्नेछ। त्यस्तै, पत्रकारिताको व्यावसायिक विकासका लागि मिडिया र डिजिटल साक्षरता अभिवृद्धि गर्ने, संस्थानको आम्दानी बढाउन दिगो स्रोत पहिचान गर्ने, तथा सरकारी निकायको सहमति र आर्थिक सहभागितामा तालिम सञ्चालन गर्ने लगायतका कार्यहरू कार्यविधिमा उल्लेख छन्।

महाप्रबन्धक ऐरीले एकेडेमीले पत्रकारिताका विस्तारित आयाममा समग्र सञ्चारकर्मीको क्षमता विकासका लागि पाठ्यक्रममा आधारित तालिम तथा प्रशिक्षण कार्यक्रमहरू सञ्चालन गर्ने बताए। उनका अनुसार यसले डिजिटल तथा आम सञ्चार साक्षरता र अनुसन्धानमा समेत जोड दिनेछ।

एकेडेमी सञ्चालनका लागि संस्थानका अध्यक्ष र महाप्रबन्धक संरक्षक रहने गरी कार्यदल गठन गरिनेछ। एकेडेमीलाई आवश्यकताअनुसार विषयगत विज्ञ, प्रशिक्षक र परामर्शदाताको सूची (रोस्टर) तयार पारिनेछ। संस्थानका अनुसार, एकेडेमीले सम्बन्धित सरकारी निकाय, विश्वविद्यालय, पत्रकार महासंघ, विशेषज्ञ एवं निजी संस्थाहरूसँग समन्वय गर्नेछ। साथै, डिजिटल अर्काइभ, ई–लाइब्रेरी, अनलाइन तालिम र डिजिटल प्रकाशन प्रणालीको सुधार तथा विस्तारमा पनि एकेडेमीले काम गर्नेछ।