रास्वपा र विवेकशील साझाबीच पार्टी एकता

काठमाडौँ– राष्ट्रिय स्वतन्त्र पार्टी (रास्वपा) र विवेकशील साझा पार्टीबीच एकता भएको छ। आइतबार औपचारिक रुपमा काठमाडौँस्थित राष्ट्रियसभा गृहमा आयोजित कार्यक्रममार्फत दुवै दलका शीर्ष नेताले एकता घोषणापत्रमा हस्ताक्षर गरेका हुन्।

रास्वपातर्फबाट कार्यवाहक पार्टी सभापति डोलप्रसाद अर्याल र उपसभापति एवं उच्च संवाद समितिका संयोजक डा स्वर्णिम वाग्ले तथा विवेकशील साझाका अध्यक्ष समीक्षा बास्कोटा र सो पार्टीका उपाध्यक्ष एवं राजनीतिक संवाद समितिका संयोजक प्रकाशचन्द्र परियारले एकता पत्रमा हस्ताक्षर गरे। वैकल्पिक राजनीति, पारदर्शिता र सुशासनको अभियानलाई थप मजबुत बनाउन एकता महत्त्वपूर्ण हुने उनीहरूको भनाइ छ।

उनीहरूबीच पाँचबुँदे सहमति पनि भएको छ। सहमतिअनुसार, रास्वपाको राजनीतिक सिद्धान्त र नेतृत्व निःशर्त स्विकार्दै स्वर्गीय उज्ज्वल थापा एवं विवेकशील अभियानको योगदानलाई दस्ताबेजीकरण गरी मान्यता दिइनेछ।

रास्वपाको पहिलो महाधिवेशनसम्मका लागि बनाइएको संघीय नेतृत्व मञ्चमा विवेकशील साझाबाट आउने नेताहरूलाई आपसी समझदारीमा मनोनयन गरिनेछ र उनीहरूको वरीयता केन्द्रीय समितिको सदस्य रहनेछ।

“विवेकशील साझा पार्टीका सदस्य र सल्लाहकारहरूलाई केन्द्रीय , प्रादेशिक र स्थानीय तहगत संरचनामा समुचित समायोजन गरी तोक्दा योग्यता, समावेशिताको सिद्धान्त र सार्वजनिक छविलाई आधार मानिनेछ,” सहमति पत्रमा भनिएको छ।

एकीकरणपछि दलको नाम राष्ट्रिय स्वतन्त्र पार्टी र चुनाव चिह्न घण्टी नै रहने वार्ता समितिका उपसंयोजक शिशिर खनालले जानकारी दिए। एकता घोषणा कार्यक्रममा दुवै दलका नेता तथा कार्यकर्ताको उपस्थिति थियो।