एसीसी यू१९ प्रिमियर कपः उपाधिका लागि नेपाल र यूएई भिड्दै

काठमाडौँ– संयुक्त अरब इमिरेट्स (यूएई)मा जारी एसीसी पुरुष यू१९ प्रिमियर कप क्रिकेटको उपाधिका लागि नेपाल र आयोजक यूएईबीच प्रतिस्पर्धा हुने भएको छ। उपाधिका लागि सोमबार बिहान १०ः३० बजे अजमानस्थित करवान मैदानमा खेल हुनेछ।

नेपालले मलेसियालाई नौ विकेटले हराएर उपाधि नजिक पुगेको हो। यूएईले भने ओमानलाई आठ विकेटले पराजित गर्दै फाइनलमा स्थान सुरक्षित गरेको हो। 

नेपाल र यूएई एसिया कप खेल्नका लागि छनोट भइसकेका छन्। प्रतियोगिताको फाइनलमा पुग्ने दुवै टोली सिधै एशिया कपमा छनोट हुने प्रावधान छ।

सेमिफाइनलमा पराजित हुने टोलीबीच तेस्रो स्थानका लागि खेल हुने र तेस्रो स्थान हासिल गर्ने टोली पनि एशिया कपमा पुग्ने व्यवस्था छ। 

तेस्रो स्थानका लागि सोमबार मलेसिया र ओमान खेल्नेछन्। प्रतियोगितामा १४ टोलीको सहभागिता थियो। यू१९ एशिया कप आगामी डिसेम्बरमा यूएईमा हुँदैछ।