नेपालले बाढी प्रभावित श्रीलंकालाई २ लाख अमेरिकी डलर सहयोग गर्ने

काठमाडौँ– नेपाल सरकारले विनाशकारी बाढीबाट प्रभावित श्रीलंकालाई राहत र पुनर्स्थापनाका लागि दुई लाख अमेरिकी डलर सहयोग गर्ने निर्णय गरेको छ। परराष्ट्र मन्त्रालयले आइतबार विज्ञप्ति जारी गर्दै उक्त सहयोगबारे औपचारिक रूपमा जानकारी दिएको हो।

सरकारले बाढीका कारण देशभर धेरैको ज्यान गएको र व्यापक क्षति भएको भन्दै श्रीलंका सरकार र जनताप्रति दुःख व्यक्त गरेको छ। मन्त्रालयका अनुसार, कठिन समयमा नेपाल श्रीलंकाको साथमा दृढतापूर्वक उभिएको छ। सरकारले शोकसन्तप्त परिवारप्रति समवेदना प्रकट गर्दै घाइतेहरूको शीघ्र र पूर्ण स्वास्थ्यलाभको कामनासमेत गरेको छ।

श्रीलंकाको राजधानीलगायत देशका धेरै भागमा आएको विनाशकारी बाढीले मृत्यु हुनेको संख्या कम्तीमा १५९ पुगेको अधिकारीहरूले बताएका छन्। विपद् व्यवस्थापन केन्द्र (डीएमसी)ले मृतक संख्या १५९ र २०३ जना बेपत्ता रहेको पुष्टि गरेको छ।

शक्तिशाली चक्रवात 'दितवाह'बाट शुरू भएको विपद्पछि राजधानी कोलम्बोका केही भागमा अझै पनि पानीको सतह बढिरहेको छ। केलानी नदीको सतह निरन्तर बढ्दा उत्तरी क्षेत्र ठूलो बाढीको चपेटामा परेको डीएमसीले जनाएको छ। डीएमसीका एक वरिष्ठ अधिकारीका अनुसार, चक्रवातले देश छाडे पनि माथिल्लो क्षेत्रमा परेको भीषण वर्षाले केलानी नदी किनारका बस्तीहरू अहिले डुबानमा परेका छन्।

राष्ट्रपति अनुरा कुमारा दिसानायकले चक्रवातको गम्भीर परिणामलाई मध्यनजर गर्दै शनिबार नै देशभर आपतकालीन अवस्था घोषणा गर्दै अन्तर्राष्ट्रिय सहयोगका लागि अनुरोध गरेका छन्।

राष्ट्रपतिको अपिलपछि भारतले तुरुन्तै राहत सामग्री तथा उद्धारकार्यका लागि चालक दलसहित दुईवटा हेलिकप्टर पठाई पहिलो प्रतिक्रिया दिएको छ। जापानले पनि तत्कालीन आवश्यकताको मूल्यांकन गर्न आफ्नो टोली पठाउने र थप सहयोग उपलब्ध गराउने वाचा गरेको छ।

चक्रवात र बाढीको संयुक्त प्रभावले देशभर २० हजारभन्दा बढी घर पूर्ण रूपमा क्षतिग्रस्त भएका छन्। एक लाख २२ हजारभन्दा बढी नागरिक राज्यद्वारा सञ्चालित अस्थायी आश्रयस्थलमा बस्न बाध्य छन् भने बाढीबाट विस्थापित थप आठ लाख ३३ हजार मानिसलाई तत्काल मानवीय सहायताको आवश्यकता परेको छ।

राहत तथा उद्धार कार्यलाई तीव्र बनाउन सेना, नौसेना, वायुसेना, नागरिक सुरक्षाकर्मी तथा स्वयंसेवकहरू देशभर तैनाथ गरिएको छ। बाढीका कारण देशको करिब एकतिहाइ भागमा बिजुली आपूर्ति अवरुद्ध भएको छ र सुरक्षित पिउने पानीको अभाव बढेको छ। अधिकारीहरूले यो विपद् सन् २०१७ यताकै सबैभन्दा घातक प्राकृतिक विपद् बनेको स्मरण गराएका छन्।