हङकङ आगलागीमा मृतकको संख्या १४६ पुग्यो

हङकङको एक आवास क्षेत्रमा यस साता लागेको भीषण आगलागीमा मृत्यु हुनेहरूको संख्या १४६ पुगेको प्रहरीले आइतबार पुष्टि गरेको छ। प्रहरीको विपद् पहिचान युनिटले खोजी क्षेत्र विस्तार गरेपछि थप शवहरू भेटिएका हुन्।

‘वाङ फुक कोर्ट’मा भएको यो आगलागीलाई सन् १९८० यताकै विश्वको सबैभन्दा गम्भीर आवासीय आगलागी मानिएको छ। प्रहरीका वरिष्ठ अधीक्षक साङ सु–यिनले पत्रकारहरूलाई जानकारी दिँदै भने, “अहिलेसम्म १४६ जनाको मृत्यु पुष्टि भएको छ। अझै थप मृतक भेटिन सक्ने सम्भावना छ।”

आगलागीको कारण पत्ता लगाउन सरकारले बहु–विभागीय छानबिन समिति गठन गरेको छ। यसै क्रममा भ्रष्टाचार नियन्त्रण निकायले घटनासँग सम्बन्धित ११ जनालाई पक्राउ गरेको छ। तीमध्ये तीन जनालाई प्रहरीले हत्याको आरोपमा पनि पक्राउ गरेको छ।

हङकङस्थित इन्डोनेसियाली दूतावासका अनुसार सात जना इन्डोनेसियाली नागरिकको ज्यान गएको छ भने फिलिपिन्स दूतावासले एक फिलिपिनी कामदारको मृत्यु भएको पुष्टि गरेको छ। आइतबार ‘ताइ पो’ क्षेत्रमा रहेको उक्त आवास क्षेत्रमा मृतकप्रति श्रद्धाञ्जली अर्पण गर्न एक हजारभन्दा बढी नागरिक शान्तिपूर्वक भेला भएका थिए।

यसबाहेक, हङकङको भवन विभागले प्राविधिक सुरक्षा सुनिश्चित गर्न ३० निजी भवन निर्माणका कामहरू अस्थायी रूपमा रोक्ने निर्णय गरेको छ।