प्रतिनिधिसभा निर्वाचनका लागि १२० दलको निवेदन

काठमाडौँ– आगामी फागुन २१ गतेका लागि तोकिएको प्रतिनिधिसभा सदस्य निर्वाचनका लागि आयोगमा १२० दलले निवेदन दिएका छन्।

मंसिर १ देखि १० गतेसम्म निवेदनको समय दिइएकोमा पछि चार दिन थप गरिएको थियो। आयोगका प्रवक्ता नारायणप्रसाद भट्टराईका अनुसार, थप गरिएको समय आइतबारसम्म एकल निर्वाचन चिह्न प्रयोग गर्नेसमेत गरी १२० राजनीतिक दलले निवेदन दिएका छन्।

प्राप्त निवेदनहरूको जाँचबुझ गरी मंसिर २० गतेभित्र आयोगबाट स्वीकृति दिने कार्यतालिका रहेको छ।

त्यस्तै, मंसिर ५ गते सम्पन्न भएको मतदाता नामावली संकलनमा कुल आठ लाख ३७ हजार ९४ नयाँ मतदाता थपिएका छन्।

कात्तिक १६ गतेसम्म १८ वर्ष उमेर पूरा भएका नयाँ मतदाता मतदान नामावलीमा दर्ता भएसँगै कुल मतदाता एक करोड ८१ लाख ६८ हजार २३ पुगेका छन्।  विसं २०७९ को प्रतिनिधिसभा तथा प्रदेशसभा निर्वाचनमा एक करोड ७९ लाख ८८ हजार ५७० मतदाता रहेका थिए।