कुश्मिसेरा–राङ्खानी सडक: २ वर्षमा सक्नुपर्नेमा ६ वर्षमा ६५ प्रतिशत मात्रै प्रगति

बागलुङ– दक्षिण बागलुङको ‘लाइफलाइन’का रूपमा रहेको कुश्मिसेरा–राङ्खानी सडक ६ वर्षमा ६५ प्रतिशत मात्रै काम सकिएको छ। निर्माण कम्पनीको लापरबाहीका कारण सडक कालोपत्रको कामले गति लिन नसकेको हो। 

समयमै कालोपत्र नहुँदा स्थानीयले सास्ती खेप्नुपरेको छ। निर्माण व्यवसायीले सरासर काम गरेको भए चार वर्षअगाडि नै कालोपत्र भइसक्थ्यो। विसं २०७६ असोजमा दुई वर्षमा सक्ने गरी ठेक्का सम्झौता भएको सडकको ६ वर्षमा आधा मात्रै काम भएको हो।

समय–समयमा ठेकेदार सम्पर्कविहीन हुँदा सडक अलपत्र पर्दै आएको थियो। अहिले लामो समयपछि काम गर्न थालेको छ। कुश्मिसेरादेखि देवलधारासम्मको १० किलोमिटर सडक हिउँदमा धुलो तथा बर्खामा हिलोका कारण स्थानीय र यात्रुले सास्ती खेप्नुपरेको छ। सडकको धुलोका कारण बारीका तरकारी, फलफूल र घाँस सबै ढाकिने गरेको स्थानीय कसलचन्द्र पाध्यायले गुनासो गरे।

“यो सडक खुलेको धेरै वर्ष बित्यो तर अहिलेसम्म स्तरोन्नति हुन सकेको छैन, बर्खाभरि हिलो बगेर बारीका अन्नबाली बसै पुरिन्छ, हिउँदमा धुलो घरभित्रै पस्छ, बसाइँसराइ गरेर कता जानु?, नजाऊँ धुलो र हिलोले हैरान बनायो”, उनले भने, “यहाँभन्दा माथिको सडक कालोपत्र भयो, कुश्मिसेरासम्म पक्की नै छ, सडक कालोपत्रको जिम्मा पाएर काम नगर्नेलाई कारबाही गर्नु पर्‍यो।”

जैमिनी नगरपालिकाका उपप्रमुख हरिहर शर्माले वर्षौदेखि सडक स्तरोन्नति नहुँदा बागलुङको जैमिनी नगरपालिका र बरेङ गाउँपालिकासहित गुल्मीका हजारौँ नागरिकले सास्ती खेप्नुपरेको बताए। काम समयमै सक्नका लागि निर्माण कम्पनीलाई बारम्बार आग्रह गर्दै आएको भन्दै अहिले तीव्र गतिमा काम गर्ने छनक देखाएको शर्मा बताउँछन्।

बागलुङको जैमिनी नगरपालिका र बरेङ गाउँपालिकालाई समेट्दै गुल्मीको शान्तिपुर जोड्न यो प्रमुख सडक हो। २४ करोड ५८ लाख रुपैयाँमा २०७८ सालमा सक्ने गरी पूर्वाधार विकास कार्यालय बागलुङमार्फत शर्मा क्याराभान जेभीसँग ठेक्का सम्झौता भएको थियो। समयमै काम नसकेपछि अहिलेसम्म पाँच पटक म्याद थप गरेको पूर्वाधार विकास कार्यालयका इन्जिनियर प्रकाश श्रीसले जानकारी दिए। चैतअगाडि पाँच किलोमिटर र त्यसपछाडि बाँकी सडक कालोपत्र गर्ने गरी काम भइरहेको उनको भनाइ छ।

“यहाँको १० किलोमिटर सडकलाई अब दुई खण्डमा काम गर्ने गरी निर्माण कम्पनी अगाडि बढेको छ, अहिले चिसो बढेको हुँदा रुम्टाखोलासम्म अब तत्कालै कालोपत्र गर्ने र त्यसभन्दा माथि चैत पछाडि गर्ने भनिएको छ, निर्माण कम्पनीले सडक फराकिलो बनाउनेसँगै कालोपत्रका लागि बेस ओसार्ने काम गरी रहेको छ,” इन्जिनियर श्रीसले भने।