विमान दुर्घटना : उद्धारका लागि दुईवटा हेलिकप्टर परिचालन

काठमाडौँ– पोखरामा भएको विमान दुर्घटनामा उद्धारका लागि दुई वटा हेलिकप्टर परिचालन गरिएको छ।

नेपाल नागरिक उड्डयन प्राधिकरणको खोज तथा उद्धार समन्वय केन्द्रले जारी गरेको विज्ञप्तिमा पोखराबाट ९एनएएलएक्स र ९एनएएलए हेलिकोप्टर परिचालन गरिएको उल्लेख छ।

साथै काठमाडौँ तथा पोखरा विमानस्थलमा खोज तथा उद्धार कार्यका लागि थप हेलिकप्टरहरू तयारीका साथ राखिएको र स्थलमार्गबाट खोजी कार्यका लागि नेपाली सेना, सशस्त्र प्रहरी बल, विमानस्थल ‘रेस्क्यू एन्ड फायर फाइटिङ’ तथा नेपाल प्रहरी समेत संलग्न भई उद्धार भइरहेको केन्द्रले जानकारी दिएको छ।

केन्द्रका अनुसार विमानमा ५३ जना नेपाली नागरिक, पाँच जना भारतीय, चार जना रसियन नागरिक थिए। साथै, कोरियाका आयरल्यान्ड, अर्जेन्टिना, फ्रान्स एक/एक साथै चार जना चालक दलका चार जना सदस्य थिए। चालक दलका सदस्यमा क्याप्टेन कमल केसी र अन्जु खतिवडा थिए भने विमान परिचारिकामा सिर्जना होङ्गचुन र ओसिन आले मगर थिए।

केन्द्रका अनुसार एनवाईटी ६९१ नम्बरको ९एन–एएनसी विमान पोखरा टावरसँग बिहान १०:५० बजे सेती खोँच भन्ने स्थानमा सम्पर्कमा आएको र सोपश्चता उक्त विमान दुर्घटना भएको हो। यती एयरलाइन्सका प्रवक्ता सुदर्शन बर्तौलाका अनुसार काठमाडौँ विमानस्थलबाट बिहान १०:३३ बजे विमान पोखराका लागि उडान भरेको थियो।