मौद्रिक नीति अर्धवार्षिक समीक्षा : मूल्यवृद्धिले सीमा नाघ्यो

काठमाडौँ– सरकारले चालू आर्थिक वर्षका लागि मुद्रास्फीति ७ प्रतिशतको वाञ्छित सीमाभित्र राख्ने लक्ष्य राखेको थियो।

तर, चालु आर्थिक वर्षको पहिलो छ महिनामा मुद्रास्फीति उक्त सीमाभन्दा बढी भएको छ। नेपाल राष्ट्र बैंकले शुक्रबार सार्वजनिक गरेको चालू आर्थिक वर्ष २०७९/८० को मौद्रिक नीतिको अर्धवार्षिक समीक्षाअनुसार पुस मसान्तमा वार्षिक विन्दुगत मुद्रास्फीति ७.२६ प्रतिशत छ।

गत आर्थिक वर्ष २०७८/७९ को पुस मसान्तमा यस्तो मुद्रास्फीति ५.६५ प्रतिशत थियो।  “वार्षिक विन्दुगत आधारमा २०७९ पुस मसान्तमा आयात मूल्य सूचकांक ८.७ प्रतिशतले बढेको छ। तलब सूचकांक १२.३९ प्रतिशत र ज्यालादर सूचकांक ९.६४ प्रतिशतले वृद्धि भएको छ। पेट्रोलियम पदार्थको मूल्य वृद्धि र नेपाली रुपैयाँको अवमूल्यनका कारण आयातित वस्तुहरूको मूल्य बढ्न गई उपभोक्ता मूल्यमा चाप पर्न गएको छ,” समीक्षामा राष्ट्र बैंकले भनेको छ।

बाह्य तथा आन्तरिक आर्थिक परिदृश्यलाई दृष्टिगत गर्दा मूल्यमा रहेको चापमा कमी आउन अझै केही समय लाग्ने पनि राष्ट्र बैंकको भनाइ छ।