त्रिभुवन विमानस्थलका ७ पसललाई १५ लाख जरिबाना

काठमाडौँ– उपभोक्तासँग बजार मूल्यभन्दा बढी मूल्य लिएको पाइएपछि त्रिभुवन अन्तर्राष्ट्रिय विमानस्थलभित्र सञ्चालित सात पसल कारबाहीमा परेका छन्।

नापतौलमा हेरफेर गरेको, चर्को मूल्य असुलेको गुनासोपछि एयरपोर्टभित्रका ती पसलमाथि वाणिज्य, आपूर्ति तथा उपभोक्ता हित संरक्षण विभागले अनुगमन गरेको थियो। अनुगमनका क्रममा उपभोक्तासँग बजार मूल्यभन्दा बढी मूल्य लिएको पाइएपछि कारबाही गरिएको विभागले जनाएको छ।

रिलेवलिङ गरेको, गुणस्तर परिमाण, मूल्य, नापतौलमा हेरफेर गरेको कसुरका आधारमा पसलहरूलाई दुई लाखदेखि तीन लाख रुपैयाँसम्म जरिबाना गरिएको विभागको दैनिक अनुगमन विवरणमा उल्लेख छ। विभागले कुल सात वटा पसललाई कारबाही गरेर १५ लाख जरिबाना गरेको छ। त्यस्तै, विभागले ६ वटा पसललाई सामान्य निर्देशन दिएको छ।