स्कटल्यान्डद्वारा नेपाललाई २७५ रनको लक्ष्य, लीस्कको शतक

काठमाडौँ– माइकल लीस्कको शतकप्रेरित स्कटल्यान्डले आईसीसी विश्वकप लिग–२ त्रिकोणात्मक ओडीआई सिरिजमा नेपाललाई २७५ रनको लक्ष्य दिएको छ।

त्रिवि क्रिकेट मैदानमा स्टकल्यान्डले निर्धारित ५० ओभरमा ९ विकेट गुमाउँदै २७४ रन बनाएको हो। स्कटल्यान्डका लागि लीस्कले अविजित रहँदै सर्वाधिक १०७ बनाए। उनले ८५ बलमा ३ चौका र ९ छक्का प्रहार गरे। ओपनर क्रिस्टोफर म्याकब्राइड र मध्यक्रमका ब्रान्डन म्याकुलमले २२/२२ रन बनाए। यस्तै, मार्क वाटले २० रन बनाए।

यस्तै कप्तान रिचि बेरिंगटन र थोमस म्याकिन्टोसले १९/१९ रन बनाए। क्रिस ग्रेभ्ब्स १६ रन बनाउँदै आउट भए। ज्याक जार्विस र माइकलले सातौँ विकेटका लागि ८१ रनको साझेदारी गरेका थिए। आठौँ विकेटका लागि माइकल र मार्कले ७६ रनको साझेदारी गरेका थिए।

नेपालका सन्दीप लामिछानेले सर्वाधिक ३ विकेट लिए। उनले १० ओभर बलिङ गर्दै २७ रन खर्चिए। कुशल मल्लले २ विकेट लिए। दीपेन्द्रसिंह ऐरी र कुशल भुर्तेलको नाममा १/१ विकेट रह्यो।