'ए' डिभिजन लिग : थ्रीस्टारको पहिलो जित

काठमाडौँ– अजय मार्टिन्सको २ गोलप्रेरित थ्रीस्टार फुटबल क्लबले शहीद स्मारक 'ए' डिभिजन लिगमा पहिलो जित हात पारेको छ।

च्यासल मैदानमा शुक्रबार सम्पन्न खेलमा थ्रीस्टारले नवप्रवेशी एफसी खुमलटारलाई २-० गोल अन्तरले पराजित गरेको हो। थ्रीस्टारको जितमा मार्टिन्स निर्णायक रहे।

खेलको पहिलो हाफ गोलरहित बराबरी सकिएको थियो। तर, दोस्रो हाफमा भने थ्रीस्टार २ गोल गर्न सफल भयो। खेलको ५४औँ मिनेटमा मार्टिन्सले थ्रीस्टारलाई अग्रता दिलाए।

८३औँ मिनेटमा दोस्रो गोल गर्दै उनले थ्रीस्टारलाई पहिलो जित दिलाए। थ्रीस्टार पहिलो खेलमा विभागीय टोली एपीएफसँग २-० गोल अन्तरले पराजित भएको थियो। दोस्रो खेलमा भने फ्रेन्ड्स क्लबसँग ३-३ गोलको बराबरी खेलेको थियो।

खुमलटारको जारी प्रतियोगितामा यो दोस्रो हार हो। यसअघि खुमलटार नवप्रवेशी चर्च ब्वाइजसँग ३-१ गोल अन्तरले पराजित भएको थियो। त्यसअघि पहिलो खेलमा खुमलटारले फ्रेन्ड्स क्बललाई १-० गोल अन्तरले पराजित गरेको थियो थियो।

जितसँगै थ्रीस्टारले ३ खेलबाट ४ अंक जोडेको छ। पराजित खुमलटारको ३ अंक छ।