५० हजार घुससहित वडाध्यक्ष र वडासचिव पक्राउ

काठमाडौँ- धनुषा, जनकपुरधाम उपमहानगरपालिका-११ का वडाध्यक्ष अर्जुनकुमार चौधरी र वडा सचिव माधवकुमार राय घुस रकमसहित पक्राउ परेका छन्।

उनीहरूलाई अख्तियार दुरुपयोग अनुसन्धान आयोगको कार्यालय, बर्दिवासबाट खटिई गएको टोलीले ५० हजार घुससहित पक्राउ गरेको हो। 

जग्गा दर्ता कायम गर्ने सर्जमिन मुचुल्काको रोहबरमा दस्तखतका लागि सेवाग्राहीसँग घुस माग गरिरहेको उजुरीको आधारमा उनीहरूलाई जनकपुरधाम-६, रामजानकी हस्पिटल नजिकबाट पक्राउ गरिएको कार्यालयका सूचना अधिकारी कृष्णप्रसाद हुमागाईंले जानकारी दिए। 

घटनाबारे थप अुनसन्धान भइरहेको अख्तियारले जनाएको छ।