उपनिर्वाचन हुने तीन क्षेत्रमा उम्मेदवारी दर्ता हुँदै, को-को हुँदैछन् उम्मेदवार?

ठूला दलले तीन क्षेत्रमा नै उम्मेदवार टुंगो लगाइसकेका छन्। नेकपा माओवादी केन्द्रले भने कुनै पनि क्षेत्रमा उम्मेदवारी घोषणा गरेको छैन। उसले सबै क्षेत्रमा सत्ता गठबन्धनका दललाई सघाउने सम्भावना छ।

उकालो

सोमबार, २० चैत, २०७९

उपनिर्वाचन हुने तीन क्षेत्रमा उम्मेदवारी दर्ता हुँदै, को-को हुँदैछन् उम्मेदवार?

काठमाडौँ- आगामी वैशाख १० गते उपनिर्वाचन हुने तीन क्षेत्र तनहुँ-१, चितवन-२ र बारा-२ मा सोमबार उम्मेदवारी दर्ता हुँदैछ। निर्वाचन आयोगले ती क्षेत्रका लागि बिहान १० बजेदेखि अपराह्न ५ बजेसम्म उम्मेदवारी दर्ता गर्ने समय तोकेको छ।

ठूला दल र गठबन्धनले यी क्षेत्रमा उम्मेदवार टुंगो लगाइसकेका छन्। नेकपा माओवादी केन्द्रले भने कुनै पनि क्षेत्रमा उम्मेदवारी घोषणा गरेको छैन। उसले सबै क्षेत्रमा सत्ता गठबन्धनका दललाई सघाउने सम्भावना छ।

नेपाली कांग्रेसले तनहुँ-१ मा गोविन्द भट्टराई र चितवन-२ मा जीतनारायण श्रेष्ठलाई उम्मेदवार बनाएको छ। सत्ता गठबन्धनबाट बारा-२ मा जसपा अध्यक्षा उपेन्द्र यादव उम्मेदवार बन्ने सम्भावना छ। नेकपा एमालेले तनहुँ-१ मा सर्वेन्द्र खनाल र चितवन-२ मा रामप्रसाद न्यौपानेलाई उम्मेदवार बनाउने भएको छ। बारा-२ का लागि एमालेले उम्मेदवार टुंगो लगाइसकेको छैन।

राष्ट्रिय स्वतन्त्र पार्टीले तनहुँ-१ मा स्वर्णिम वाग्ले, चितवन-२ मा सभापति रवि लामिछाने र बारा-२ मा रमेश खरेललाई उम्मेदवार बनाउने भएको छ।

यस्तै जनमत पार्टीले बारा-२ मा शिवचन्द्रप्रसाद कुशवाहालाई उम्मेदवार बनाउने भएको छ। उनी केही दिनअघि मात्रै माओवादी परित्याग गरेर जनमत प्रवेश गरेका थिए। मंसिर ४ गते भएको चुनावमा उनी जसपाका रामसहाय यादवसँग झिनो मतले पराजित भएका थिए। 

राष्ट्रिय प्रजातन्त्र पार्टीले तनहुँ-१ मा शोभा गुरूङ, चितवन-२ मा जीवलाल पुरी र बारा-२ मा सोनेलाल साहलाई उम्मेदवार बनाउने भएको छ। 

आयोगले उम्मेदवारी दर्ता गर्न जाँदा बाजागाजासहित नजान र २५ जनाभन्दा धेरै भेला नहुन आग्रह गरेको छ।

प्रतिनिधिसभा
उपनिर्वाचन
प्रतिक्रिया दिनुहोस !