उपत्यका मेयर्स फोरममा चिरीबाबु

काठमाडौँ– उपत्यका मेयर्स फोरमको अध्यक्षमा ललितपुर महानगरपालिकाका प्रमुख चिरीबाबु महर्जन चयन भएका छन्।

फोरमको उपाध्यक्षमा वासुदेव थापा, महासचिवमा घनश्याम गिरी, सचिवमा प्रकाश अधिकारी, कोषाध्यक्षमा कृष्णहरि महर्जन र सहसचिवमा सुरेन्द्र श्रेष्ठ चयन भएका छन्। उनीहरू क्रमशः सूर्यविनायक, चन्द्रागिरि, टोखा, तारकेश्वर र मध्यपुरथिमीका नगरप्रमुख हुन्।

यस्तै फोरमको सदस्यमा उपत्यकाका बाँकी सबै नगरका प्रमुख र उपप्रमुख  रहेका छन्। काठमाडौँ उपत्यकामा रहेका महानगरपालिका, उपमहानगरपालिका तथा नगरपालिकाका प्रमुख तथा उपप्रमुखको फोरम बनाइएको हो।

यस्तै फोरमको बैठकले नयाँ कार्यसमिति चयन गर्दै उपत्यका प्रवेश गर्ने प्रमुख नाका नागढुंगामा ‘अटोमेटिक भेहिकल डिटेक्सन एन्ड मनिटरिङ सिस्टम’ जडान गर्ने प्रक्रिया अगाडि बढाउने निर्णय गरेको छ।

यसका लागि दुई करोड रुपैयाँ लगानी आवश्यक पर्ने जनाइएको छ।