सरकारको नीति तथा कार्यक्रम संसद्‌मा प्रस्तुत हुँदै

काठमाडौँ– सरकारको वार्षिक नीति तथा कार्यक्रम आज सार्वजनिक हुँदैछ। दिउँसो ४ बजे बस्ने दुवै सदनको संयुक्त बैठकमा राष्ट्रपति रामचन्द्र पौडेलले सरकारको नीति तथा कार्यक्रम प्रस्तुत गर्ने संसद् सचिवालयले जनाएको छ।

राष्ट्रपति निर्वाचित भएपछि संघीय संसद्‌मा पौडेलको यो पहिलो सम्बोधन हुन लागेको हो। संघीय संसद्‍मा सरकारको वार्षिक नीति तथा कार्यक्रम प्रस्तुत हुने तथा त्यसमाथि छलफल गरी पारित गर्ने व्यवस्था छ।

उक्त बैठकपछि आजै प्रतिनिधिसभा र राष्ट्रियसभाका बेग्लाबेग्लै बैठक बस्ने छन्। प्रधानमन्त्री पुष्पकमल दाहाल ‘प्रचण्ड’ले राष्ट्रपति पौडेलले गरेको नीति तथा कार्यक्रमको प्रति ती बैठकमा टेबुल गर्नेछन्। 

भारतमा उपचार गराएर फर्किएपछि आराम गरिरहेका राष्ट्रपति पौडेलले नीति तथा कार्यक्रम प्रस्तुत गर्न सक्नेर नसक्ने संशय थियो। तर, स्वास्थ्यमा सुधार आएकाले राष्ट्रपति पौडेलले नै नीति तथा कार्यक्रम प्रस्तुत गर्ने भएका हुन्। 

सरकारले आज पेस गर्ने नीति तथा कार्यक्रममाथि प्रतिनिधिसभा र राष्ट्रियसभामा आइतबारदेखि लगातार केही दिन छलफल हुनेछ।

सो छलफल समाप्त भएपछि जेठ १५ गते वार्षिक बजेट प्रस्तुत हुने संवैधानिक व्यवस्था छ।