आगामी भारत भ्रमण दुवै देशका लागि ऐतिहासिक बन्नेछ: प्रधानमन्त्री

काठमाडौँ– प्रधानमन्त्री पुष्पकमल दाहाल ‘प्रचण्ड’ले आफ्नो आगामी भ्रमण दुवै देशका लागि ऐतिहासिक बन्ने बताएका छन्।

भारतसँग खुला सीमा, आर्थिक, राजनीतिक, सामाजिक र जनता–जनताबीचको सम्बन्धको दृष्टिकोणबाट सम्बन्ध विशिष्ट रहेकाले भ्रमणको विशेष महत्त्व रहेको उनको भनाइ छ।

शनिबार काठमाडौँमा कान्तिपुर हाफ म्याराथनको उद्घाटन गर्दै प्रधानमन्त्री दाहालले देशको एकता र परिवर्तन रक्षाको संकल्पसहित आफू प्रधानमन्त्रीको जिम्मेवारीमा रहेको उल्लेख गरे।

“यो परिवर्तनमार्फत नै जनतालाई सेवा, सुशासन र विकास दिन सकिन्छ भन्ने संकल्पसहित यो पटक म प्रधानमन्त्रीको जिम्मेवारीमा छु,” उनले भने, “हिजोका दिनमा भएका राष्ट्रिय एकता, सहमति र सहकार्यलाई जीवन्त तुल्याउन दलहरूबीच छलफल भइरहेको छ।”

शीर्ष नेताबीच हुने गरेका छलफल पनि तिनै विषयका साथै संसदीय समिति, संक्रमणकालीन न्याय र  गणतन्त्र विरोधी प्रवृत्तिलाई निरुत्साहित गर्न केन्द्रित हुने गरेको उनले स्पष्ट पारे। 

सरकार खेलकुदको विकासलाई उच्च प्राथमिकतामा राखेर देशको प्रतिष्ठा र समाजमा अनुशासन कायम गर्न लागेको प्रधानमन्त्री दाहालको भनाइ थियो।