कोलकातालाई १ रनले हराउँदै लखनऊ प्लेअफमा

काठमाडौँ– लखनऊ सुपर जायन्ट्स इन्डियन प्रिमियर लिग (आईपीएल)को प्लेअफमा पुगेको छ।

गएराति भएको खेलमा घरेलु टोली कोलकाता नाइट राइडर्सलाई १ रनले हराउँदै लखनऊले प्लेअफमा स्थान बनाएको छ।

इडेड गार्डेनमा जितका लागि १७७ रनको लक्ष्य पछ्याएको कोलकाताले निर्धारित २० ओभरमा ७ विकेट गुमाउँदै १७५ रन बनायो। कोलकातालाई अन्तिम ओभरमा २१ रन चाहिएको थियो। रिंकु सिंहले अन्तिम तीन बलमा दुई छक्का र एक चौका प्रहार गरे पनि टोलीको झिनो हार टार्न सकेनन्।

सानदार प्रदर्शन गरेका रिंकु ६७ रनमा नटआउट रहे। उनले ३३ बलमा ६ चौका र ४ छक्का प्रहार गरेका थिए। ओपनर जेसन रोय ४५ रनमा आउट भए। 

लखनऊका रवि विश्नोई र यश ठाकुरले २/२ विकेट लिए। क्रुनाल पान्ड्या र कृष्णाप्पा गौथमका नाममा १/१ विकेट रह्यो। 

त्यसअघि टस हारेर पहिला ब्याटिङको निम्तो पाएको पाहुना टोली लखनऊले निर्धारित २० ओभरमा ८ विकेट गुमाउँदै १७६ रन बनाएको थियो।

लखनऊका निकोलस पुरनले ५८ रन बनाए। उनले ३० बलमा ४ चौका र ५ छक्का प्रहार गरेका थिए। क्विन्टन डि कक २८, प्रेरक माकांड २६ र आयुष बदोनी २५ रन बनाएर आउट भए। 

कोलकाताका शार्दुल ठाकुर, सुनिल नारायण र वैभव आरोराले २/२ विकेट लिए। लखनऊ ८ जित र ५ हारसहित १७ अंककासाथ तेस्रो स्थानमा छ।