युरोपमा आगामी वर्ष ग्यासको अभाव हुनसक्ने

युक्रेन युद्धका कारण रुसले ग्यासको आपूर्तिमा कटौती गरिरहेको अवस्थामा युरोपले अर्को वर्ष प्राकृतिक ग्यासको अभाव हुन नदिन तत्काल कदम चाल्नुपर्ने अन्तर्राष्ट्रिय ऊर्जा एजेन्सीले बिहीबार चेतावनी दिएको छ।

सन् २०२३ को ग्रीष्म ऋतुमा आफ्नो अर्थतन्त्रलाई चलायमान बनाउन र भण्डारण स्थललाई पर्याप्त मात्रामा भर्न आवश्यक पर्ने ३० अर्ब घन मिटर ग्यास अभाव हुन सक्ने पेरिसस्थित एजेन्सीले एक प्रतिवेदनमा उल्लेख गरेको छ।

आईईएका अनुसार यदि रुसले पाइपलाइनमार्फत् हुने इन्धन आपूर्तिलाई पूर्ण रूपमा बन्द गर्‍यो र चीनले तरलीकृत प्राकृतिक ग्यासको आयात बढायो भने ग्यास अभाव हुनेछ। यूरोपले रूसी आपूर्ति प्रतिस्थापन गर्न चीनमाथि भरोसा गरेको छ।

रुसले युक्रेनमाथि गरेको आक्रमणलाई लिएर पश्चिमा प्रतिबन्धको प्रतिशोध स्वरूप युरोपलाई आपूर्तिमा भारी कटौती गरेको थियो, तर यो क्षेत्र आगामी हिउँदका लागि भण्डारण स्थलहरू भर्न सक्षम भएको यसअघि बताइएको थियो।

मस्कोले यस वर्ष युरोपलाई ६० अर्ब घन मिटर ग्यास आपूर्ति गरेको छ। आईईएले एक रिपोर्टमा बताएअनुसार रुसले सन् २०२३ मा त्यति नै रकम उपलब्ध गराउने सम्भावना निकै कम छ र यसले पूर्ण रूपमा आपूर्ति बन्द गर्न सक्छ।

विकसित देशहरूलाई ऊर्जा नीतिबारे सल्लाह दिने निकाय आईईएले आगामी वर्ष अभावको जोखिमबाट बच्न युरोपले ‘तत्काल कदम चाल्नुपर्ने’ बताएको छ।