गति पैदा गरेन भने समाजवादी मोर्चा दुर्घटना हुन्छ: घनश्याम भुसाल

काठमाडौँ– एकीकृत समाजवादीका महासचिव घनश्याम भुसालले हालै गठन भएको समाजवादी मोर्चाले गति पैदा गरेन भने दुर्घटनामा पर्ने बताएका छन्।

मार्क्सवादी ज्ञान केन्द्रको आयोजनामा बिहीबार काठमाडौँमा शुरू भएको संगठनात्मक कार्यशाला एवं अभिमुखीकरण गोष्ठीको उद्घाटन गर्दै उनले वर्तमान आवश्यकतालाई मात्र मोर्चाले ध्यान दिए त्यसको औचित्य समाप्त हुने टिप्पणी गरे।

“सुविचारित सही दिशामा गतिशील सकिएन भने मोर्चा मात्र होइन, अहिलेको राजनीतिक दलको औचित्य सकिन्छ,” उनले भने, “इमानदार तवरले जनतासम्म पुग्न नसक्दा चल्ता राजनीतिक दल कमजोर हुँदै गएका छन्।” महासचिव भुसालले जनतासँग समाहित नभएको पार्टी लोप हुँदै जाने भएकाले त्यसतर्फ ध्यान दिन सुझावसमेत दिए। 

बनिबनाउ पुस्ताबाट समाज परिवर्तन असम्भव रहेकाले नयाँ पुस्तामा राजनीतिक चेत विकास हुनुपर्ने उनको भनाइ छ। वर्तमान ‘पपुलिस्ट’ संस्कृतिलाई विस्थापित गर्नका ठूलो शक्ति पैदा हुने तर्क गर्दै महासचिव भुसालले वर्तमान राजनीतिक दलले रोक्न सकेनन् भने अब आउने दिनमा लोप हुनुको विकल्प नरहेको उनको भनाइ थियो।

नेतृत्वलाई अन्ध समर्थन गर्दा चेतनास्तर कमजोर देखिएको भुसालको टिप्पणी छ। दुई दिनसम्म चल्ने गोष्ठीमा देशभरबाट ६० जनाभन्दा बढी सहभागी छन्।

गोष्ठीमा संस्कृति प्रवर्द्धन र आयआर्जन, पठन संस्कृतिलाई बढाउने, समाजवाद र पुँजीवादका विषयका विभिन्न पक्षबारे छलफल हुनेछ।