ललिता निवास प्रकरणबारे सीआईबीले भन्यो– मुद्दा दर्ता हुन्छ, अगाडि बढ्छ

काठमाडौँ– नेपाल प्रहरीको केन्द्रीय अनुसन्धान ब्युरो (सीआईबी)ले ललिता निवास जग्गा प्रकरणमा मुद्दा दर्ता नहुने भन्ने प्रश्न नै नरहेको स्पष्ट पारेको छ।

बुधबार पत्रकार सम्मेलन गर्दै सीआईबी प्रमुख एआईजी किरण बज्राचार्यले मुलुकी ऐन, २०२० अनुसार सरकारी लिखत कीर्तेमा हदम्याद लागू नहुने दाबी गरिन्।

“मुद्दा नगर्ने प्रश्न नै आउँदैन। मुद्दा दर्ता हुन्छ। अगाडि बढ्छ। हदम्यादको सन्दर्भमा पनि दुबिधा गर्नुपर्ने प्रश्न छैन,” उनले भनिन्, “सानोभन्दा सानो मुद्दामा पनि चलखेल गर्ने पक्ष रहन्छ नै। उनीहरूलाई जवाफ दिने हामीसँग यथेष्ट प्रमाणहरू छन्।” यो प्रकरणमा लामो अनुसन्धान गरेर पक्राउ गरिएको एआइजी बज्राचार्यको भनाइ छ।

सीआईबीले मंगलबार भानभटेनी सुपरमार्केटका सञ्चालक मीनबहादुर गुरुङ, निर्वाचन आयोगका पूर्वआयुक्त सुधिरकुमार शाहसहित ७ जनालाई पक्राउ गरेको थियो।