प्रितम सिंहबारेको अभिव्यक्तिलाई लिएर बबण्डर मच्चाउन खोजियोः प्रधानमन्त्री

काठमाडौँ– प्रधानमन्त्री पुष्पकमल दाहाल ‘प्रचण्ड’ले पुस्तक विमोचनमा सरदार प्रितम सिंहबारे दिएको अभिव्यक्तिलाई लिएर बबण्डर मच्चाउन खोजिएको बताएका छन्।

अनेरास्ववियु क्रान्तिकारीको प्रशिक्षण कार्यक्रमलाई बुधबार काठमाडौँमा सम्बोधन गर्दै दाहालले सोमबार लेखक किरणदीप सन्धुद्वारा लिखित पुस्तक ‘रोड्स टु द भ्याली’ (द लिगेसी अफ सरदार प्रीतम सिंह इन नेपाल) को विमोचन कार्यक्रममा प्रितम सिंहले बोलेको कुरा आफूले बोलेको दाबी गरे। आफूले पुस्तक विमोचन कार्यक्रममा उनी सामाजिक सेवा र यातायातको क्षेत्रमा मात्रै नभइ राजनीतिमा पनि चासो राख्ने व्यक्ति भएको र आफूलाई प्रधानमन्त्री बनाउनका लागि कहिले दिल्ली, कहिले नेपालका पार्टीहरूसँग लाग्नुहुन्थ्यो भन्ने अभिव्यक्ति दिएको बताए। 

प्रधानमन्त्री दाहालले बेलुनरुपी बबण्डर चाँडै फुट्ने दाबी गरे। उनले भने, “उहाँ –प्रितम सिंह)को बारेमा भनेको कुरालाई अब उचालेर फेरि एकपटक बबण्डर गर्न खोजिएको छ, त्यो बेलुन पनि छिटै फुट्नेवाला नै छ। त्यसले केही दिनेवाला छैन। हाम्रा विपक्षीमा कति धेरै विक्षिप्तता छ, कति धेरै पूर्वाग्रह छ भन्ने देखिन्छ।”

दाहालले चाँडै नै माओवादीहरू एउटै केन्द्रमा आउने र सबै संगठन एउटै केन्द्रमा आएर नयाँ समाजवादी आन्दोलन शुरू गर्ने बताए। उनले जनताका मुद्दा बोकेर हिँड्दा सरकारबाट कसैले हल्लाउन नसक्ने बताए। २०८४ सालको निर्वाचनमा २०६४ सालमा जितेको भन्दा बढी सिट जित्ने दाबी पनि उनले गरे।