कारागारमा कैदीको मृत्युबारे छानबिन गर्न समिति गठन

संखुवासभा– जिल्ला कारागार संखुवासभामा दुईजना कैदीबन्दीको मृत्यु भएको घटनाको छानबिन गर्न समिति गठन भएको छ। 

संखुवासभाका सहायक प्रमुख जिल्ला अधिकारी मोहनमणि घिमिरेको संयोजकत्वमा तीन सदस्यीय समिति गठन गरिएको हो। जिल्ला कारागारमा रहेका कैदीबन्दीको बुधबार बिहान मृत्यु भएको थियो। मृत्यु हुनेमा मादी नगरपालिका–५ का १९ वर्षीय विनोद तोलांगी र नुवाकोट ककनी गाउँपालिका–७ का २८ वर्षीय आकाश बलामी छन्। 

जिल्ला प्रशासन कार्यालयमा बसेको सुरक्षा समितिको बैठकले छानबिन समिति गठन गरेको हो। घटनाको छानबिनका लागि समिति गठन गरिएको र छिट्टै सत्यतथ्य बाहिर आउने प्रमुख जिल्ला अधिकारी शिवकुमार कार्कीले जानकारी दिए। 

संखुवासभाका डीएसपी वीरेन्द्र गोदारका अनुसार मंगलबार राति कारागारको चर्पीबाट भाग्ने क्रममा रहेका उनीहरूलाई कारागार प्रहरीले पक्राउ गरी कारागार प्रशासनलाई बुझाएको थियो। 

उनीहरू बिहान ४ बजे कारागारभित्रै अचेत अवस्थामा फेला परेपछि उपचारका लागि जिल्ला अस्पतालमा पुर्‍याइएको र सोही अस्पतालमा मृत्यु भएको जेलर राजेन्द्र घिमिरेले बताए। 

बलात्कार मुद्दामा कैद सजाय भुक्तान गरिरहेका तोलांगी र चोरी मुद्दामा कैद सजाय भुक्तान गरिरहेका बलामी कारागारबाट भाग्ने प्रयास गरेका थिए।